Solapur, 13 July : संभाजी ब्रिगेडचे प्रदेशाध्यक्ष प्रवीण गायकवाड यांच्यावर शाई ओतून त्यांच्यावर हल्ला केल्या प्रकरणी शिवधर्म फाउंडेशनचे दीपक काटे यांच्यासह सात जणांवर अक्कलकोट पाेलिसांनी गुन्हा दाखल केला आहे. संभाजी ब्रिगेडचे सोलापूरचे जिल्हाध्यक्ष संभाजी भोसले यांनी अक्कलकोट उत्तर पोलिस ठाण्यात फिर्याद दिली आहे. या कार्यकर्त्यांवर कारवाई करण्यात यावी, यासाठी भोसले रात्री उशिरपर्यंत अक्कलकोट उत्तर पोलिस ठाण्यात ठाण मांडून होते.
दरम्यान, हल्ल्यानंतर प्रवीण गायकवाड (Pravin Gaikwad) हे सोलापूरमध्ये आले. सोलापुरात डॉ शिवरत्न शेटे यांच्या शिवसह्याद्री आरोग्य धाम या क्लिनीकमध्ये प्रवीण गायकवाड यांची तपासणी करण्यात आली. त्यानंतर सोलापूरमध्ये माध्यमांशी बोलून गायकवाड हे अकलूजकडे रवाना झाले आहेत.
शिवधर्म फाउंडेशनचे अध्यक्ष दीपक काटे (रा. इंदापूर, जि. पुणे), किरण साळुंखे (रा. भवानी नगर, इंदापूर, जि. पुणे), भैय्या ढाणे (रा. भवानी नगर, इंदापूर, जि. पुणे), कृष्णा क्षीरसागर (रा. कसबा, बारामती शहर, जि.पुणे), अक्षय चव्हाण (रा. तांदूळवाडी, बारामती, जि. पुणे), बाबू बिहारी (रा. तांदूळवाडी, ता. बारामती, जि. पुणे), भवानेश्वर बबन शिरगिरे (रा. इंदापूर, जि. पुणे) अशी गुन्हा दाखल झालेल्यांची नावे आहेत.
फत्तेसिंह शिक्षण संस्था आणि सकल मराठा समाजाच्या वतीने अक्कलकोट (Akkalkot) येथील स्वामी समर्थ अन्नछत्र मंडळाचे संस्थापक अध्यक्ष जन्मजेयराजे भोसले यांच्या सत्कार समारंभाचे आयोजन करण्यात आले होते. प्रवीण गायकवाड यांच्या हस्ते भोसले यांचा सत्कार होणार हेाता. मात्र, कार्यक्रमाला जाण्यापूर्वीच गायकवाड यांच्यावर हल्ला करण्यात आला.
जन्मजेयराजे भोसले यांच्या सत्कार समारंभासाठी प्रवीण गायकवाड कुटुंबासह अक्कलकोटला आले होते. आल्यानंतर ते कार्यक्रमाच्या ठिकाणी जात असतानाच शिवधर्म फाउंडेशनचे दीपक काटे आणि त्यांच्या कार्यकर्त्यांनी गायकवाड यांच्यावर शाई ओतली. त्यानंतर गाडीत जाऊन बसलेले गायकवाड यांना बाहेर काढून धक्काबुक्की करण्यात आली.
दरम्यान, प्रवीण गायकवाड यांच्यावर हल्ला करणारे दीपक काटे आणि त्यांचे सहकारी हे इंदापूर तालुक्यातून आले असल्याचे समजते. गायकवाड येण्यापूर्वी काटे आणि त्यांचे सहकारी येऊन थांबले होते. त्यांनी पहिल्यांदा गायकवाड यांच्यावर शाई ओतली आणि त्यानंतर गाडीत बसलेल्या गायकवाडांंना बाहेर काढून त्यांच्यावर हल्ला करण्यात आला. संभाजी भोसले आणि सहकाऱ्यांनी गायकवाडांना बाजूला नेले.
संभाजी भोसले यांनी अक्कलकोट पोलिसांत फिर्याद दिली असून त्यानुसार दीपक काटे याच्यासह सात जणांवर पोलिसांनी गुन्हा दाखल केला आहे. हल्लेखोरांवर कड कारवाई करण्यात यावी, यासाठी भोसले हे अक्कलकोट पोलिस ठाण्यात रात्री उशिरापर्यंत ठाण मांडून होते.
हल्ल्यानंतर प्रवीण गायकवाडांची प्रतिक्रिया
अक्कलकोट माझ्यावर झालेला हल्ला हा माझ्या हत्येचा कटच होता. मात्र, संभाजी ब्रिगेडच्या कार्यकर्त्यामुळे मी वाचलो. ते भाजपचेच कार्यकर्ते असून ते शिवधर्म प्रतिष्ठानच्या नावाने काम करतात. माझ्यावर झालेल्या हल्ल्याला पूर्णपणे सरकार जबाबदार आहे. पण माझ्यावर हल्ला करणारे आणि घडवून आणणाऱ्यांना निश्चितपणे सांगतो की ही शेवटाची सुरुवात आहे, असा इशारा प्रवीण गायकवाड यांनी हल्ल्यानंतर माध्यमांशी बोलताना दिला.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.