Satara Politic's : फडणवीसांची साताऱ्यात मोठी खेळी; अजितदादांना ‘कात्रज’चा घाट दाखवत एकनाथ शिंदेंना घातली वेसन!

Satara, 25 May : सातारा जिल्ह्यात राष्ट्रवादी काँग्रेस शरदचंद्र पवार पक्षाला मोठा धक्का बसला आहे. गेली दोन पिढ्यांपासून एकनिष्ठ असलेल्या पाटणकरांनी प्रथमच ज्येष्ठ नेते शरद पवार यांची साथ सोडत कमळ हाती घेण्याचा निर्णय घेतला आहे. वास्तविक, सत्यजित पाटणकर हे उपमुख्यमंत्री अजित पवार यांच्या राष्ट्रवादी काँग्रेसमध्ये प्रवेश करतील, असा सर्वांचा होरा होता. पण, तो अंदाज चुकवत सत्यजित पाटणकर यांनी भाजपमध्ये जाण्याचा निर्णय घेतला आहे. यामध्ये सार्वजनिक बांधकाम मंत्री शिवेंद्रराजेंनी महत्वाची भूमिका बजावली आहे, त्यामुळे अजितदादांना ‘कात्रजचा घाट दाखवत शंभूराज देसाई यांच्या माध्यमातून एकनाथ शिंदेंना वेसन घालण्याचे काम मुख्यमंत्री देवेंद्र फडणवीस यांनी केले आहे.

सत्यजित पाटणकर (Satyajeet Patankar) यांचे वडिल विक्रमसिंह पाटणकर हे शरद पवार यांचे अत्यंत निकटवर्तीय म्हणून ओळखले जात होते. पाटणकर हे १९८३ पासून २००४ चा अपवाद वगळता २००९ पर्यंत विधानसभेत होते. त्यानंतर २०१४ पासून त्यांचे चिरंजीव सत्यजित पाटणकर हे राजकीय वारसा चालवत आहेत. पण, त्यांनी तीव वेळा विधानसभा निवडणूक लढवली, मात्र, त्यात त्यांना यश आले नाही.

विधानसभेच्या २०२४ च्या निवडणुकीत महाविकास आघाडीतील राष्ट्रवादी काँग्रेस शरदचंद्र पवार पक्षाकडून (NCP SP) त्यांना उमेदवारी अपेक्षा होती. मात्र, पवारांनी तो मतदारसंघ उद्धव ठाकरे यांच्या शिवसेनेला सोडला आणि त्याच ठिकाणी पाटणकर यांच्या मनातील पवारांविषयीच्या प्रतिमेला तडा गेल्याचे बोलले जात आहे. त्यानंतर राज्यात महायुतीचे सरकार आले. पाटणकर यांचा साखर कारखाना आहे, तसेच कार्यकर्त्यांना सत्तेचे बळ मिळणे गरजचे हेाते, तेव्हापासून पाटणकर यांच्या राजकीय भूमिकडे लक्ष लागले होते.

वास्तविक शरद पवार यांची साथ सोडून सत्यजीत पाटणकर हे आपल्याकडे येतील, असे अजित पवार यांना वाटत हेाते. मात्र, सार्वजनिक बांधकाम मंत्री शंभूराज देसाई यांनी महत्वपूर्ण भूमिका निभावत पाटणरांना भाजपच्या कळपात घेऊन जाण्यात मोठी खेळल्याचे मानले जात आहे. सत्यजीत पाटणकर यांच्या भाजप प्रवेशाच्या निर्णयामुळे पाटण विधानसभा मतदारसंघात राष्ट्रवादी काँग्रेस शरदचंद्र पवार, अजित पवारांची राष्ट्रवादी काँग्रेस आणि भारतीय राष्ट्रीय कॉंग्रेस हे तीनही पक्ष पाटणमधून संपणार आहेत.

सत्यजीत पाटणकर शरद पवारांना सोडून आपल्याकडे येतील, असे अजित पवार यांना वाटत होते. पण, तसे घडले नाही. सत्यजीत पाटणकर यांच्यासोबत पाटण तालुक्यातील भारतीय राष्ट्रीय कॉंग्रेसचे एकमेव नेते हिंदुराव पाटील देखील भाजपमध्ये प्रवेश करणार आहेत, त्यामुळे पाटणमध्ये राष्ट्रवादी (शरद पवार), राष्ट्रवादी (अजित पवार) आणि भारतीय राष्ट्रीय कॉंग्रेस हे तीनही पक्ष संपण्याची चिन्हे आहेत, त्यामुळे पाटण विधानसभा मतदारसंघात आता भाजपविरुद्ध शिवसेना (एकनाथ शिंदे) अशी थेट लढत पहायला मिळणार आहे.

सत्यजीत पाटणकर यांच्या प्रवेशामुळे सातारा जिल्हा परिषदेचे समीकरण बदलणार आहे, या प्रवेशामुळे सातारा जिल्हा परिषदेत भाजपची एकहाती सत्ता येण्याची शक्यता वर्तवण्यात येत आहे. सातारा जिल्हा मध्यवर्ती सहकारी बॅंकेतदेखील भाजपचे वर्चस्व वाढणार आहे. एकंदरित पाटणकर यांचा भाजप प्रवेशाचा निर्णय हा सातारा जिल्ह्याच्या राजकारणाला कलाटणी देणारा ठरण्याची शक्यता आहे.

सत्यजीत पाटणकर आणि साताऱ्याचे पालकमंत्री तथा पर्यटन मंत्री शंभूराज देसाई हे पाटण मतदारसंघातील पारंपरिक प्रतिस्पर्धी आहेत. पाटणकर यांच्या भाजप प्रवेशाने शंभूराज देसाई यांच्या वर्चस्वाला खीळ बसण्याची शक्यता आहे. या खेळीच्या माध्यमातून देवेंद्र फडणवीस यांनी शंभूराज देसाईंचे टेन्शन वाढवून एकनाथ शिंदेंना वेसन घालण्याचे काम सुरू केल्याचे मानले जात आहे.

शंभूराज देसाईंना पाटणकरांचा प्रवेश का रोखता आला नाही?

सध्या सातारा जिल्ह्यात भाजपचे सर्वात जास्त आमदार आहेत, तरीही पालकमंत्रिपद शंभराज देसाई यांच्या वाट्याला गेले आहे. पालकमंत्रिपद मिळाल्यामुळे मुख्यमंत्री देवेंद्र फडणवीस यांच्यासोबत शंभूराज देसाईंचे खास संबंध आहेत, असे जिल्ह्यात बोलले जात आहे. पण, आता हेच खास संबंध वापरून शंभूराज देसाई यांना सत्यजीत पाटणकर यांचा प्रवेश का रोखता आला नाही, अशी चर्चा आता सातारा जिल्ह्यात रंगली आहे.