ऊसदरासाठी शेतकरी संघटना आक्रमक; सोलापुरात चार ट्रॅक्टरचे टायर फोडले; कोल्हापुरात वाहतूक रोखली

कोल्हापूर/पंढरपूर : ऊस (sugarcane) दरासाठी (FRP) शेतकरी संघटना आक्रमक झाल्या आहेत. कोल्हापुरात (kolhapur) दत्त डालमिया साखर कारखान्याची, तर सोलापूर (Solapur) जिल्ह्यात सांगोला शेतकरी, पांडुरंग, युटोपीयन आणि सद्‌गुरु या कारखान्यांची वाहतूक आक्रम कार्यकर्त्यांनी रोखून धरली आहे. त्यामुळे उसदराचा प्रश्न आगामी काळात पेटणार असल्याचे दिसून येत आहे. (Farmers organization aggressive for sugarcane price in solapur & kolhapur)

दरम्यान, सोलापूर जिल्ह्यात बुधवारी (ता. २७ ऑक्टोबर) रात्री ऊस वाहतूक करणाऱ्या चार ट्रॅक्टरचे टायर फोडण्यात आले आहेत. त्यानंतर आज दुपारी पंढरपूर- कराड मार्गावर सोनके येथे ऊसाची वाहने अडवून आंदोलन‌ सुरू केले आहे.

कोल्हापुरात स्वाभीमानी शेतकरी संघटना आक्रमक झाली आहे. पन्हाळा तालुक्यातील दत्त डालमिया साखर कारखान्याची ऊस वाहतूक शेतकरी संघटनेच्या कार्यकर्त्यांनी रोखून धरली आहे.

कारखाना प्रशासन आणि संघटना पदाधिकाऱ्यांची चर्चा फिस्कटली. डालमिया कारखान्याने पहिली उचल ३०७५ जाहीर केली आहे. गेल्या वर्षाच्या पेक्षा या वर्षी पहिली उचल कमी असल्यानं शेतकरी संघटना आक्रमक झाली आहे. जोपर्यंत ३०७५ पेक्षा जास्त पहिली उचल जाहीर होत नाही; तोपर्यंत कारखान्याच धुराडं पेटवू देणार नाही, असा इशारा स्वाभिमानी शेतकरी संघटनेने दिला आहे.

पंढरपुरात ऊसतोडणी ठप्प

पंढरपूर येथील ऊस दर संघर्ष समितीच्या कार्यकर्त्यांनी आज ऊस वाहतूक रोखली आहे. सांगोला शेतकरी, पांडुरंग, युटोपीयन आणि सद्‌गुरु या साखर कारखान्याकडे जाणारी उसाची सुमारे ५० वाहने अडवली आहेत. पंढरपूरपासून जवळ असलेल्या सोनके गावात संघर्ष समितीच्या कार्यकर्त्यांनी उसाची वाहतूक रोखून धरत आंदोलन केले. बुधवारी रात्री ऊस वाहतूक करणाऱ्या चार ट्रॅक्टर चे टायर फोडले आहेत. त्यानंतर आज दुपारी पंढरपूर- कराड मार्गावर सोनके येथे ऊसाची वाहने अडवून आंदोलन‌ सुरू केले आहे.

यंदाच्या हंगामात ऊसाला पहिली उचल अडीच हजार रुपये जाहिर करावी अशी मागणी ऊसदर संघर्ष समितीच्या वतीने करण्यात आली आहे. या मागणीसाठी आंदोलन पुकारण्यात आले आहे. कालपासून ऊसदर आंदोलन तीव्र झाले आहे. अनेक भागातील शेतकर्यांनी ऊसदराच्या मागणीसाठी ऊस तोडी बंद केल्या आहेत तर काही ठिकाणी ऊस वाहतूक रोखली जाते आहे.

आज पंढरपूर परिसरातील ऊस तोडणीची कामे पन्नास टक्के बंद झाली आहेत. परिणामी कारखान्याच्या गाळपावर परिणाम झाला आहे. ऊसदराची कोंडी फोडावी अशी मागणी ऊसदर संघर्ष समितीचे समन्वयक दीपक भोसले यांनी केली आहे.