Gokul Milk Rate : CNG, पेट्रोल, डिझेलनंतर आणखी एका दरवाढीचा शॉक : कोल्हापूरमध्ये होणार 'गोकुळ'च्या नवीन दराचा निर्णय

Gokul Milk Rate: इराण-अमेरिकेतील भडकलेल्या युद्धाचे गंभीर परिणाम भारतात दिसू लागले आहेत. बुधवारी (15 मे) पेट्रोल आणि डिझेलच्या दरात प्रतिलिटर 3 रुपयांची दरवाढ लागू झाली आहे. याचा परिणाम आता पुरवठा साखळीवर होणार असून सर्वच क्षेत्रात महागाईचा भडका उडण्याची शक्यता आहे.

अशातच बुधवारी अमूल दूध संघाने म्हैस आणि गायीच्या दुधामध्ये प्रतिलिटर २ रुपयांची दरवाढ जाहीर केली आहे. त्याचबरोबर मदर डेअरीने देखील दूध दरवाढ केली आहे. वाढत्या इंधन दरामुळे आता गोकुळ दूध संघ देखील दूध दरवाढ करण्याचा निर्णय घेण्याच्या तयारीत आहे. म्हैस आणि गाय दुधाच्या विक्रीमध्ये दरवाढ करण्यात येणार असून शनिवारी होणाऱ्या प्रशासक बोर्ड मिटिंगमध्ये याबाबतचा निर्णय होण्याची शक्यता आहे.

कोल्हापूर जिल्हा सहकारी दूध उत्पादक संघाची शनिवारी (दि.16), प्रशासक मंडळाची बैठक होणार आहे. 4 मी रोजी संचालक मंडळाची मुदत संपल्याने नियुक्त झालेल्या 5 सदस्यीय मंडळाची बैठक होणार आहे. या बैठकीत गोकुळ दूधाच्या खरेदी, विक्री दरवाढी संदर्भात निर्णय होण्याची शक्यता आहे.

पेट्रोल आणि डिझेलच्या दरवाढीमुळे दूध पुरवठ्यावर परिणाम होणार आहे. वाहतुकीच्या खर्च वाढणार आहे. शिवाय दुधावर प्रक्रिया करून ते ग्राहकापर्यंत पोहचवण्याचा अधिक खर्च आहे. त्यामुळे देशातील दोन मोठ्या दूध संस्थांनी अमूल व मदर डेअरीकडून दूध विक्री दरामध्ये वाढ केली आहे. आता गोकुळ दूध संघ देखील दरवाढ करण्याच्या तयारीत आहे.

... तर महिनाभरात दुसऱ्यांदा वाढ

गोकुळमधील संचालकांची मुदत संपण्यापूर्वी संचालक मंडळाने म्हैस व गाय दुधाच्या प्रतिलिटर खरेदी व विक्री दुधामध्ये २ रुपयांची वाढ केली होती. त्यामुळे प्रतिलिटर म्हैस दूध ७० रुपयांना ग्राहकांना मिळत होते. शनिवारी पुन्हा दरवाढीच्या निर्णय झाल्यास प्रतिलिटर ७२ रुपये दर होण्याची शक्यता आहे. त्यामुळे इंधन दरवाढीसोबत दूध दरवाढीचा बोजा ग्राहकांवर पडणार आहे.