Chandrakant Patil : नुसत्या मेळाव्याने हवा टाईट! विषय संपवण्यासाठी जयंत पाटलांचा फोन, चंद्रकांत पाटलांचा दावा

आमदार गोपीचंद पडळकर यांनी राजारामबापू यांच्याबद्दल केलेल्या वक्तव्यानंतर सांगली जिल्ह्यातील राजकीय वातावरण ढवळून निघाले आहे. माजी मंत्री आणि आमदार जयंत पाटील यांच्या गटाचे कार्यकर्ते आणि आमदार गोपीचंद पडळकर यांच्या गटाचे कार्यकर्ते एकमेकांवर अक्षरश: तुटून पडलेत.

अशातच भाजपकडून गोपीचंद पडळकर यांच्या समर्थनार्थ मेळावा घेत जयंत पाटील यांच्यावर आरोपांच्या फैरी झाडत आहेत. मात्र, या मेळाव्यानंतर सांगली जिल्ह्यातील विरोधकांची हवा एकदम टाइट झाली आहे. भाजपच्या मेळाव्यानंतर जयंत पाटील यांच्याकडून थेट फोन केल्याचा दावा स्वतः मंत्री चंद्रकांत पाटील यांनी केला आहे.

भाजपकडून इशारा सभा घेण्यात आल्यानंतर सांगली जिल्ह्यातील भाजप पदाधिकारी आणि नेत्यांच्या भावना तितक्याच तीव्र बनल्या आहेत. त्यावर राज्याचे उच्च शिक्षण मंत्री चंद्रकांत पाटील यांनी आमदार जयंत पाटील यांचा आपल्याला फोन आल्याची माहिती दिली आहे. जयंत पाटील यांच्याकडून विषय संपवा असे बोलण्यात आले. त्यावर वार झाला तर त्याला प्रतिवार हा होणारच. असे स्पष्टपणे चंद्रकांत पाटील यांनी सांगितलं आहे. भाजपच्या इशारा सभानंतर आपण परतफेड केले असल्याचे देखील मंत्री पाटील यांनी स्पष्ट केले.

कार्यकर्त्यांना आवाहन करताना, 'भाजपला अरे म्हणणाच्याला कारे म्हणण्याची तयारी कार्यकत्यांनी ठेवली पाहिजे. भाजपची इशारा सभा होऊ नये, असे जयंत पाटील यांना वाटत होते. जयंत पाटील यांचे साखर कारखाने लाटण्याचे प्रकरण ही तर केवळ प्रस्तावना आहे. दगाबाजांनो पुस्तक वाचा महाराष्ट्राचे वाटोळे कोणी केले, हे तुम्हाला समजेल. असेही चंद्रकांत पाटील म्हणाले.

महाराष्ट्राची ही स्थिती दगाबाजाने निर्माण केली. ते म्हणाले, महाराष्ट्राच्या दगाबाजाने किती साखर कारखाने घेतले, कुठे मालमत्ता ठेवली? हे सारे गुपित आहे. निवडणूक आयोगाच्या शपथपत्रात एक गाडीही त्यांच्या नावावर नाही. पण, त्यांची किती विमाने आहेत, कोणत्या विमान कंपन्यात गुंतवणूक आहे, हे माहिती आहे. आता वेळीच शहाणे व्हा, असा इशारा देण्यासाठी ही सभा आहे. असे चंद्रकांत पाटील म्हणाले.