Gore Meet Deshmukh : पालकमंत्री जयकुमार गोरेंनी आमदार विजयकुमार देशमुखांना सांगितली मुख्यमंत्री देवेंद्र फडणवीसांची इच्छा

1. सोलापूर महापालिका निवडणुकीसाठी भाजपची मोर्चेबांधणी सुरू असून पालकमंत्री जयकुमार गोरे यांनी आमदार विजयकुमार देशमुख यांच्याशी सविस्तर चर्चा केली.

2. शिवसेनेशी युती, उमेदवारी वाटप आणि शहर उत्तर विधानसभा मतदारसंघातील राजकीय रणनीती यावर दोघांत खल झाला.

3. मुख्यमंत्री देवेंद्र फडणवीस यांची शिवसेनेशी युती व्हावी अशी इच्छा असल्याचा संदेश गोरे यांनी देशमुखांना दिला.

Solapur, 20 December : सोलापूर महापालिका निवडणुकीसाठी भारतीय जनता पक्षाकडून जोरदार मोर्चेबांधणी करण्यात येत आहे. पालकमंत्री जयकुमार गोरे यांनी आज (ता. २० डिसेंबर) आमदार विजयकुमार देशमुख यांच्या निवासस्थानी भेट देऊन त्यांच्याशी तासभर चर्चा केली. शिवसेनेशी युती, उमेदवारी यासह शहर उत्तर विधानसभा मतदारसंघातील राजकीय रणनीतीबाबत दोघांत चर्चा झाली. शिवसेनेशी युती व्हावी, अशी मुख्यमंत्री देवेंद्र फडणवीस यांची इच्छा असल्याचेही गोरे यांनी या बैठकीत देशमुखांना सांगितले.

सोलापूर महापालिका निवडणूक प्रमुखपदी आमदार सचिन कल्याणशेट्टी (Sachin Kalyanshetti) यांची नियुक्ती करण्यात आली होती. मात्र, त्यांनी ही जबाबदारी स्वीकारण्यास नकार दिला आहे. महापालिका निवडणूक आणि जिल्हा परिषद, पंचायत समिती निवडणूक एकत्र येण्याची शक्यता लक्षात घेऊन कल्याणशेट्टी यांनी महापालिका निवडणूक प्रमुख होण्यास नकार कळविला आहे.

कल्याणशेट्टी यांनी निवडणूक प्रमुख होण्यास नकार दर्शविल्यानंतर पालकमंत्री गोरे यांनी आज आमदार विजयकुमार देशमुख (Vijaykumar Deshmukh) यांची भेट घेऊन निवडणुकीबाबत चर्चा केली. उपमुख्यमंत्री एकनाथ शिंदे यांच्या नेतृत्वाखालील शिवसेनेशी युती, उमेदवारी यासह शहर उत्तर विधानसभा मतदारसंघातील राजकीय रणनीतीबाबत दोघांमध्ये चर्चा झाली.

पालकमंत्री गोरे हे शुक्रवारी रात्रीच सोलापूर मुक्कामी पोहोचले होते. त्यामुळे गोरे यांनी शनिवारी सकाळीच आमदार देशमुख यांचे निवासस्थान गाठले. आमदार देशमुख यांनी गोरेंचे स्वागत केले. मुख्यमंत्री देवेंद्र फडणवीस यांची शिवसेनेशी युती व्हावी, अशी इच्छा असल्याचा निरोप गोरे यांनी आमदार देशमुख यांना दिला.

युती झाली तर शिवसेनेला किती व कोणत्या जागा द्यायच्या, यावर चर्चा झाली. त्याबाबत येत्या २५ डिसेंबरपर्यंत उमेदवारांची यादी प्रदेश पातळीवर पाठवायची आहे. ती अंतिम करण्यासह उत्तर मतदारसंघातील एकूण राजकीय रणनीतीबाबत पालकमंत्री गोरे आणि आमदार देशमुख यांच्यात खल झाला.

पालकमंत्री जयकुमार गोरे यांच्या भेटीबाबत आमदार विजयकुमार देशमुख म्हणाले, माझ्या आईची विचारपूस करण्यासाठी पालकमंत्री जयकुमार गोरे हे घरी आले होते. साहजिकच तासभर राजकीय चर्चाही झाली. शिवसेनेशी युती व्हावी, ही मुख्यमंत्री देवेंद्र फडणवीस यांची इच्छा आहे. त्याबाबत त्या पक्षाच्या नेत्यांशी, पक्षाच्या पदाधिकाऱ्यांची चर्चा सुरू आहे. चर्चेनंतरच निर्णय घेण्यात येईल.

प्र.1 : पालकमंत्री जयकुमार गोरे यांनी आमदार विजयकुमार देशमुख यांची भेट का घेतली?
उ. सोलापूर महापालिका निवडणुकीची रणनीती आणि शिवसेनेशी युतीवर चर्चा करण्यासाठी.

प्र.2 : भाजपकडून महापालिका निवडणूक प्रमुखपदी कोणाची नियुक्ती झाली होती?
उ. आमदार सचिन कल्याणशेट्टी यांची नियुक्ती झाली होती, मात्र त्यांनी नकार दिला.

प्र.3 : शिवसेनेशी युतीबाबत मुख्यमंत्र्यांची भूमिका काय आहे?
उ. शिवसेनेशी युती व्हावी, अशी मुख्यमंत्री देवेंद्र फडणवीस यांची इच्छा आहे.

प्र.4 : उमेदवारांची यादी कधीपर्यंत अंतिम करायची आहे?
उ. येत्या २५ डिसेंबरपर्यंत प्रदेश पातळीवर यादी पाठवायची आहे.