Eknath Khadse : भाजप प्रवेशाबाबत एकनाथ खडसेंचे मोठे विधान; म्हणाले, ‘भारतीय जनता पक्षात जाण्याचा माझा...’

Pandharpur, 22 June : माजी मंत्री एकनाथ खडसे हे दोन दिवसांपूर्वी मुख्यमंत्री देवेंद्र फडणवीस यांच्या कार्यक्रमाला उपस्थित होते. तसेच त्या कार्यक्रमानंतर फडणवीस-खडसे भेट होणार असल्याची चर्चा होती. मात्र, फडणवीस हे खडसेंना न भेटताच निघून गेले. मात्र, फडणवीसांच्या कार्यक्रमाला उपस्थिती लावल्याने खडसेंच्या भाजप प्रवेशाची चर्चा रंगली होती. त्यावर खुद्द खडसे यांनी स्पष्टीकरण दिले आहे.

राष्ट्रवादी काँग्रेस पक्षाचे आमदार एकनाथ खडसे आज (ता. २२ जून) विठ्ठल रुक्मिणी दर्शनासाठी पंढरपुरात आले होते. त्यावेळी माध्यमांशी बोलताना भाजप प्रवेशाबाबत भाष्य केले आहे. केंद्रीय मंत्री रक्षा खडसे याही आज सायकल वारीच्या निमित्ताने पंढरपुरात आल्या होत्या. त्या सायकल वारीत सहभागी झाल्या होत्या.

एकीकडे भाजपच्या नेत्या आणि केंद्रीय मंत्री रक्षा खडसे ह्या पंढरपुरात असतानाही एकनाथ खडसे यांच्या भाजप प्रवेशाची चर्चा पंढरपुरात सुरू होती, त्यावर खडसे यांनी उत्तर देऊन पडदा टाकण्याचा प्रयत्न केला आहे.

खडसे म्हणाले, भारतीय जनता पक्षात जाण्याचा माझा कोणताही प्रश्न नाही, हे मी अनेक वेळा सांगितले आहे. त्या गोष्टीला मी आता पूर्णविराम दिला आहे. मी राष्ट्रवादी काँग्रेस शरदचंद्र पवार पक्षासोबत कायम राहणार आहे. हे मी अनेकदा माध्यमांसमोर मांडलं आहे. पण मी भाजपमध्ये जाण्याची वारंवार चर्चा होते, त्यामुळे मनोरंजन होतं.

या सर्व प्रकारला मंत्री गिरीश महाजन कारणीभूत आहेत, असे मला वाटत नाही. गिरीश महाजन हे माझ्यादृष्टीने माझा सामान्य कार्यकर्ते होता. कार्यकर्त्याच्या माध्यमातून ते आज मंत्री झाले आहेत. मी जेव्हा मंत्री होतो, तेव्हा गिरीश महाजन यांना राज्याच्या मंत्रिमंडळात स्थान नव्हतं. मी मंत्रिपदावरून दूर गेल्यानंतरच गिरीश महाजन यांना मंत्रिमंडळात स्थान मिळाले आहे, चांगली गोष्टी आहे की, जळगाव जिल्ह्याला राज्याच्या मंत्रिमंडळात प्रतिनिधीत्व मिळाले.

दरम्यान, जळगावमधील एका कार्यक्रमासाठी देवेंद्र फडणवीस हे शुकवारी गेले होते, त्यावेळी खडसे हे व्हीआयपी कक्षात बसले होते. फडणवीस यांची भेट घेण्याचा त्यांचा प्रयत्न होता. मात्र, फडणवीस हे खडसेंना न भेटताच निघून गेले होते, त्यावेळी खडसे हे भाजपमध्ये पुन्हा प्रवेश करतील, अशी चर्चा रंगली होती.