Kolhapur Municipal Result : मतदानाच्या आधीच कोल्हापूर महापालिकेत निकाल लागला , 10 माजी नगरसेवकांचा पराभव अटळ!

Kolhapur Municipal Election : कोल्हापूर महापालिकेसाठी महायुती विरुद्ध महाविकास आघाडीतील एकमेकांच्या विरोधात लढत आहे. 15 जानेवारीला मतदान आणि 16 जानेवारीला निकाल जाहीर होणार आहे. मात्र मतदानापूर्वीच दहा माजी नगरसेवकांचा निकाल जवळपास लागल्यात जमा आहे.

मागील सभागृहातील 26 तर एकूण महापालिकेच्या सभागृहात गेलेले 53 माजी नगरसेवक या निवडणुकीच्या मैदानात शड्डू ठोकला आहे. मात्र, यातील 10 माजी नगरसेवक घरात बसणार आहेत हे जवळपास निश्चित झाले आहे. पराभूत होणारे 10 नगरसेवक नेमके कोण? येत्या 16 जानेवारी रोजी निकालानंतरच स्पष्ट होणार आहे.

2016 मध्ये निवडणूक झाली होती त्यानंतर तब्बल दहा वर्षांनी निवडणूक होत असल्याने सर्वच माजी रणांगणात उतरण्याचा निर्णय घेतला आहे. मात्र मागील सभागृहातील केवळ 26 नगरसेवकांनाच उमेदवारी दिली आहे. तर महापालिकेच्या एकूण कार्यकाळातील 27 माजी नगरसेवक निवडणूक लढवत आहेत. निवडणूक लढवणाऱ्या माजी नगरसेवकांपैकी २१ जण एकमेकांसमोर आले आहेत. त्यामुळे दहा ठिकाणी माजी नगरसेवकांमध्ये ही लढत होणार आहे. त्यामुळे माजी दहा नगरसेवकांना पराभव निश्चित आहे.

काँग्रेसकडून सर्वाधिक २२, मनसे १, भाजप ९, शिवसेना ८, राष्ट्रवादी काँग्रेसचे ४, तर जनसुराज्य शक्ती पक्षाकडूनही सात माजी नगरसेवक निवडणुकीच्या रिंगणात आहेत. तर दोन अपक्ष रिंगणात आहेत. १० ठिकाणी माजी नगरसेवकांच्या विरोधात माजी नगरसेवक उमेदवार आहेत. त्यामुळे कोणत्या तरी एका माजी नगरसेवकाचा पराभव होणार आहे. ते येत्या १६ जानेवारीला स्पष्ट होणार आहे.

या जागांवर माजी नगरसेवकांचे थेट सामना

प्रभाग क्रमांक चार ड, प्रभाग सहा ड, प्रभाग नऊ ड, प्रभाग ११ ब मध्ये तीन, प्रभाग १२ ड माजी नगरसेवकांत चुरस आहे. प्रभाग १४ ड मध्ये दोघा माजी नगरसेवकांत लढत होत आहे. प्रभाग क्रमांक १८ क, प्रभाग १९ ड, मध्ये माजी नगरसेवक आणि माजी नगरसेविका यांच्यात सामना रंगला आहे.