Kolhapur ZP Election : मुश्रीफसाहेब तुमच्यासाठी कायपण! सतेज पाटलांनी मैत्री धर्म पाळला; जिल्हा परिषद अध्यक्ष-उपाध्यक्ष बिनविरोध

Kolhapur News, 17 Mar : वैद्यकीय शिक्षण मंत्री हसन मुश्रीफ यांनी कोल्हापूर जिल्हा परिषदेवर राष्ट्रवादीचा अध्यक्ष केला. तर भाजपचा उपाध्यक्ष झाला. तत्पूर्वी महाविकास आघाडीकडून देखील ही निवडणूक लढण्याचा निर्धार झाला होता. काँग्रेसकडून अध्यक्ष आणि उपाध्यक्ष पदासाठी अर्ज केला होता.

मात्र आमदार सतेज पाटील यांच्या गटाकडून मैत्री धर्म पाळत काँग्रेस उमेदवारांचे अर्ज मागे घेतल्याने महायुतीतील राष्ट्रवादी काँग्रेसच्या शिल्पा शशिकांत खोत अध्यक्ष तर भाजपचे सदस्य तानाजी पाटील यांची जिल्हा परिषदेवर बिनविरोध निवड झाली. जिल्हाधिकारी अमोल येडगे यांच्या अध्यक्षतेखाली ही निवड झाली. त्यानंतर जिल्हाधिकारी येडगे यांनी निवड झाल्याचे जाहीर केले.

संग्रामसिंह कुपेकर यांनी महाविकास आघाडीला विनंती केली. पाच वर्षे आपण सभागृहात आहोत. कोल्हापूर नगरी ही छत्रपती शिवाजी महाराज आणि छत्रपती राजर्षी शाहू महाराज यांच्या विचाराची आहे. पाच वर्षे आपण एकमेकांना न्याय देत जिल्ह्याला विकासाचा दृष्टिकोन देत या सभागृहात राहूया. त्यामुळे महाविकास आघाडीने दाखल केलेला अर्ज मागे घ्यावा अशी विनंती केली.

काँग्रेसकडून अध्यक्ष पदासाठी शिंगणापूर जिल्हा परिषद सदस्य रसिका पाटील तर उपाध्यक्ष पदासाठी असळज जिल्हा परिषदेचे सदस्य संभाजी पाटणकर यांनी उमेदवारी अर्ज दाखल केला होता. उमेदवारी राष्ट्रवादी काँग्रेसकडून विनंती आल्यास बिनविरोध निवड करण्यासाठी अर्ज मागे घेण्यात येईल असे सांगण्यात आले होते.

त्यानुसार राष्ट्रवादी काँग्रेसकडून विनंती झाल्यानुसार महाविकास आघाडीचे अध्यक्ष पदाचे उमेदवार रसिका पाटील आणि उपाध्यक्ष पदाची उमेदवार संभाजी पाटणकर यांनी आपला अर्ज मागे घेतला. दरम्यान, आमदार सतेज पाटील यांच्या गटाने अध्यक्षपदाची निवड बिनविरोध केल्यानंतर उपाध्यक्ष निवड बिनविरोध होणार का याबाबत उत्सुकता लागून राहिली होती.

कारण पाटील आणि महाडिक गटाच्या संघर्षात महाडिक गटाचे कट्टर समर्थक तानाजी पाटील यांच्या बाबत सतेज पाटील गट काय निर्णय घेणार? याकडे लक्ष होते. मात्र या पाच वर्षात महाविकास आघाडीच्या सदस्यांना आदर व विकासनिधी बाबत कोणताही भेदभाव असू नये, अशी मागणी करत ही निवड बिनविरोध केली.