Mahadev Jankar's Announcement : महादेव जानकर लोकसभेची निवडणूक दोन जागेवरून लढणार; कोणते ते दोन मतदारसंघ?

Solapur News : माढा आणि परभणी या दोन मतदारसंघांतून मी स्वतः लोकसभेची निवडणूक लढवणार आहे. विरोधात कोणीही असले तरी दीड लाखाच्या मताधिक्याने मी निवडून येणार आहे, असा दावा राष्ट्रीय समाज पक्षाचे अध्यक्ष, आमदार महादेव जानकर यांनी केला. (Mahadev Jankar will contest the Lok Sabha elections from two constituencies)

माजी मंत्री महादेव जानकर हे सोलापूरच्या दौऱ्यावर आहेत. त्यावेळी त्यांच्याशी संवाद साधल्यानंतर आपण दोन मतदारसंघांतून लोकसभेची निवडणूक लढविणार असल्याचे स्पष्ट केले.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

जानकर म्हणाले, राष्ट्रीय समाज पक्ष भारतात जिथे उमेदवार मिळतील, त्या ठिकाणी लोकसभेच्या जागा लढवणार आहे. यामध्ये उत्तर प्रदेशमधील 80, महाराष्ट्रातील 48, कर्नाटक, छत्तीसगढ येथील काही जागांवर आपला पक्ष निवडणूक लढवणार आहे.

दरम्यान, काही दिवसांपूर्वी जानकर यांनी आपण परभणी लोकसभा मतदारसंघातून निवडणूक लढविणार असल्याचे स्पष्ट केले हाेते. तसेच, माढ्याबाबत सूतोवाच केले होते. आता त्यांनी या दोन मतदारसंघांतून निवडणूक लढविण्याची घोषणाच करून टाकली आहे. मात्र, जानकर हे महायुतीत राहतात की स्वतंत्र निवडणूक लढवितात, हे पाहणे महत्त्वाचे आहे.

अशोक चव्हाण यांच्या काँग्रेस सोडण्याबाबत महादेव जानकर यांनी भाष्य केले. ते म्हणाले, अशोक चव्हाण यांच्या राजीनाम्याबाबतीत मला काही कल्पना नाही. त्यांच्या राजीनाम्याबाबत मला बातम्यांमधूनच कळाले. त्यावर मी अभ्यास करून बोलेन, पण जे लोक सत्य आहेत, तेच राहतात, ज्यांना काही अडचणी आहेत, ते असा निर्णय घेत असतील.

आम्ही महायुतीमध्ये होतो; म्हणून भाजप सत्तेत होती. आम्ही नसल्यावर बघू आता काय होतं ते. ज्या लोकांवर आरोप केले आहेत, त्यांचा पक्ष प्रवेश घेतला, याचं उत्तर येणाऱ्या निवडणुकीत जनताच देईल, असा इशाराही जानकर यांनी भाजपला दिला. वंचित बहुजन आघाडीचे प्रमुख प्रकाश आंबेडकर यांच्या भूमिकेबाबत मात्र महादेव जानकर यांनी बोलण्यास नकार दिला.

Edited By : Vijay Dudhale

R