Ashok Kharat Case : अशोक खरात अन् महिलांच्या संबंधांचे व्हिडीओ व्हायरल करत असाल तर खबरदार! तिघांविरोधात दाखल झालाय पहिला गुन्हा

Ashok Kharat Case : विकृत भोंदूबाबा अशोक खरात याची रोज नवी प्रकरणं समोर येत आहेत. या भोंदूबाबाने अनेक महिलांना फसवून त्यांचे लैंगिक शोषण केल्याचा संशय आहे. या शोषणाचे अनेक व्हिडीओही काही दिवसांपासून व्हायरल होतं आहेत. पण हेच व्हिडीओ व्हायरल करणे तिघांना अंगलट आले आहेत. महिलांचे व्हिडिओ व्हायरल केल्याप्रकरणी तिघांविरोधात पहिला गुन्हा दाखल झाला आहे.

अहिल्यानगर जिल्ह्यातील कोपरगावमधील राहुल शिंदे, योगेश आढाव आणि बीडमधील संदीप गरजे या तीन व्यक्तींविरोधात अहिल्यानगर पोलीस स्थानकात गुन्हा दाखल झाला आहे. बी. एन. एस. कलम २९४ (२), ३ (५) सह माहिती तंत्रज्ञान कायदा २००० चे कलम ६७ (अ) प्रमाणे हा गुन्हा दाखल झाला आहे. या तीनही संशयित आरोपींच्या अटकेसाठी पोलिसांच्या स्वतंत्र टीम रवाना झाल्या आहेत.

अधिक माहितीनुसार, यातील संशयित आरोपी राहुल शिंदे याला त्याचा मित्र योगेश आढावने तर योगेश आढाव याला बीड जिल्ह्यातील माजलगावमधील संदीप गरजे याने व्हिडिओ पाठवल्याचं पोलीस तपासात समोर आले होते. व्हिडिओ पाठवणाऱ्यांची ही साखळीच पोलिसांनी 'आरोपी' केली आहे. त्यामुळे तुम्हीही हे व्हिडीओ मागत असाल तर आताच सावध व्हा. अन्यथा महिलांचे अश्लील व्हिडिओ व्हायरल केल्याप्रकरणी तुम्हालाही तुरुंगाची हवा खावी लागू शकते.

भोंदू अशोक खरात प्रकरणाचा तपास सध्या एसआयटीच्या माध्यमातून होत आहे. नाशिक पोलिसांकडे आतापर्यंत खरात विरोधात ८ गुन्हे दाखल करण्यात आले आहेत. तर वावी आणि सिन्नर पोलिसांकडील प्रत्येकी एक अशा १० गुन्हांचा एसआयटी तपास करणार आहे. त्यामुळे खरातच्या अडचणीत मोठी वाढ झाल्याचं पाहायला मिळत आहे. खरातशी संबंधित अनेक मालमत्ताही समोर येत आहेत. ज्यामध्ये प्रशासकीय अधिकाऱ्यांचे संबंध असल्याचं उघड होत आहे. त्यामुळे खरातशी संबंधित राजकीय नेते आणि अधिकाऱ्यांचे धाबे दणाणले आहेत.