Mahayuti Dispute : ‘रामराजे माढ्यात मदत करणार नसतील, तर बारामतीत सुनेत्रा पवारांना मदत नाही’

Mumbai, 12 April : माढा लोकसभा मतदारसंघावरून आता महायुतीमध्ये वादाची ठिणगी पडण्याची शक्यता आहे. कारण राष्ट्रवादी काँग्रेसचे विधान परिषदेचे माजी सभापती रामराजे नाईक निंबाळकर हे माढ्यामध्ये युतीधर्म पाळत नसल्याची तक्रार उपमुख्यमंत्री देवेंद्र फडणवीस यांच्याकडे करण्यासाठी खासदार रणजितसिंह नाईक निंबाळकर, आमदार जयकुमार गोरे आणि आमदार राहुल कुल हे नागपूरकडे खास विमानाने रवाना झाले आहेत.

दरम्यान, माढ्यात रामराजे नाईक निंबाळकर हे विरोधात काम करणार असतील, तर दौंडमधून बारामतीत सुनेत्रा पवार यांना मदत नाही, अशी आक्रमक भूमिका राहुल कुल यांनी घेतल्याची माहिती आहे. त्यामुळे महायुतीमधील वाद काही केल्या मिटण्याची चिन्हे दिसत नाहीत.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

खासदार रणजितसिंह निंबाळकर, आमदार जयकुमार गोरे आणि आमदार राहुल कुल हे खास विमानाने नागपूरकडे रवाना झाले आहेत. हे तीनही नेत्यांची उपमुख्यमंत्री देवेंद्र फडणवीस यांच्यासोबत तातडीची बैठक होणार आहे. माढा लोकसभा मतदारसंघात राष्ट्रवादी काँग्रेसकडून अर्थातच रामराजे निंबाळकर यांच्याकडून महायुतीधर्म पाळला जात नसल्याबद्दल हे तीनही नेते फडणवीस यांच्याकडे तक्रार करणार असल्याची माहिती आहे.

माढा लोकसभा मतदारसंघातून राष्ट्रवादीकडून रामराजे यांचे बंधू संजीवराजे नाईक निंबाळकर हे इच्छुक होते. तसेच भाजपकडून धैर्यशील मोहिते पाटीलही इच्छुक होते. मात्र, महायुतीकडून रणजितसिंह नाईक निंबाळकर यांना उमेदवारी घोषित करण्यात आली. त्यानंतर मोहिते पाटील यांनी बंड करत भाजपला सोडचिठ्ठी दिली आहे. दुसरीकडे रामराजेंनीही खासदार रणजितसिंह निंबाळकर यांच्याशी असहकार स्वीकारला आहे. त्यामुळे निंबाळकर यांनी राष्ट्रवादीच्या विशेषतः रामराजेंची तक्रार फडणवीसांकडे करण्याचा निर्णय घेतल्याचे दिसून येत आहे.

माढा लोकसभा मतदारसंघात मोहिते पाटील यांची ताकद निर्णायक होती. आता खुद्द धैर्यशील मोहिते पाटील हे लोकसभेच्या रिंगणात उतरले आहेत. तसेच, फलटणचे रामराजे नाईक निंबाळकर यांचे बंधूही शरद पवार यांच्या राष्ट्रवादी काँग्रेसच्या संपर्कात असल्याची चर्चा आहे. त्यामुळे रामराजे हे युतीधर्म पाळत नसल्याची तक्रार करण्यासाठी खासदार निंबाळकर, आमदार गोरे आणि राहुल कुल हे नागपूरकडे तातडीने रवाना झाले आहेत.

R