Hasan Mushrif : धनंजय मुंडेंचा राजीनामा राष्ट्रवादी काँग्रेस घेणार का? हसन मुश्रीफांनी जाहीर केली भूमिका

Kolhapur, 28 December : बीड जिल्ह्याच्या केज तालुक्यातील मस्साजोगचे सरपंच संतोष देशमुख यांचं अपहरण करून त्यांची हत्या करण्यात आली. या घटनेनं संपूर्ण महाराष्ट्रात खळबळ उडाली आहे. सत्ताधारी आणि विरोधकांमध्ये आरोप प्रत्यारोप रंगला आहे. महायुतीमध्येही अंतर्गत खटके उडायला सुरुवात झाली आहे. भाजपचे नेते आमदार सुरेश धस हे धनंजय मुंडेंच्या विरोधात आक्रमक झाले आहेत. भाजपचे प्रवीण दरेकर यांनही धस यांची पाठराखण केली. मात्र, आता मंत्री धनंजय मुंडेंचीही पाठराखण राष्ट्रवादीचे नेते हसन मुश्रीफ यांनी केली आहे.

राज्यात संतोष देशमुख (Santosh Deshmukh) यांच्या हत्येचा प्रश्न चिघळत असताना मंत्री धनंजय मुंडे यांच्या राजीनाम्याची मागणी आंदोलनकर्त्यांनी केली आहे. त्यावर मंत्री हसन मुश्रीफ यांनी धनंजय मुंडे यांनी राजीनामा देण्याची आवश्यकता नाही, असे विधान केले आहे. मुश्रीफ म्हणाले, सुरेश धस यांनी आरोप केले, त्यावेळी मी विधानसभेत उपस्थित होतो. त्याला धनंजय मुंडे यांनी उत्तर दिलेले आहे. भाजप टार्गेट करत आहे, असं काहीही नाही. मुख्यमंत्री देवेंद्र फडणवीस चौकशी करतील.

फडणवीस हे कार्यक्षम मुख्यमंत्री लाभलेले आहेत. ते तात्काळ याचा शोध घेऊन पर्दाफाश करतील. जोपर्यंत कोणी दोषी असेल असं आढळून येत नाही. तोपर्यंत राजीनामा देण्याची आवश्यकता नाही, अशा शब्दांत हसन मुश्रीफ (Hasan Mushrif) यांनी विरोधकांच्या मागणीवर प्रतिक्रिया दिली आहे.

शेंडा पार्कमधील दोन इमारतींचे पूर्ण काम पूर्ण झालेले आहे. उर्वरित दहा इमारतीचं काम मार्चपर्यंत होईल. ‘सीपीआर’चा संपूर्ण चेहरामोहरा बदललेला दिसेल, असेही मुश्रीफ यांनी सांगितले

सीपीआरमधील भ्रष्टाचाराबाबत बोलताना, भ्रष्टाचाराची चौकशी सुरू असल्याचे सांगितले. आयुक्तांच्या अधिकारात चौकशी समिती नेमली होती. त्याचा अहवाल आलेला आहे, संबंधित दोषींवर कारवाई होईल. जोपर्यंत मी आहे. तोपर्यंत कोणालाही अभय मिळणार नाही, असा इशारा मंत्री हसन मुश्रीफ यांनी दिला.

दरम्यान, पालकमंत्रिपदाबाबत बोलताना मुश्रीफ यांनी, ‘येत्या 26 जानेवारीपर्यंत कोल्हापूरचा पालकमंत्री कोण असणार? याबाबत नक्कीच कळेल, अशी प्रतिक्रिया दिली.