Solapur ZP Election : आमदार अभिजीत पाटलांचा भाऊ अन् भाजप उमेदवार यांच्यात खडाजंगी; पंढरपूर तालुक्यात चुरशीने मतदान

Pandharpur News : तब्बल आठ ते नऊ वर्षांनी जिल्हा परिषद व पंचायत समितीसाठी आज पंढरपूर तालुक्यात चुरशीने मतदान झाले. भोसे येथे अज्ञाताने सकाळी मोटारसायकल पेटवली तर करकंबमध्ये आमदार अभिजित पाटील यांचे बंधू अमर पाटील आणि भाजप उमेदवार आदिनाथ देशमुख यांच्यात खडाजंगी झाली.

यासह अन्य गावातील किरकोळ वादाचे प्रकार वगळता सर्वत्र शांततेत मतदान झाले. मतदारांना मतदान केंद्रापर्यंत आणण्यासाठी कार्यकर्ते दिवसभर धावाधाव करत असल्याचे चित्र पाहायला मिळाले. अत्यंत अटीतटीच्या निवडणुकीमध्ये कोण बाजी मारणार हे मतमोजणीनंतर स्पष्ट होणार आहे.

सकाळी सुरवातीला मतदार मतदानासाठी बाहेर पडले, दुपारी मात्र अनेक ठिकाणी मतदान केंद्रे ओस पडली. दुपारपर्यंत 2 वाजेपर्यंत तालुक्यात सरासरी 30 ते 32 टक्के इतके मतदान झाले होते. दुपार नंतर मात्र शेतातील कामे संपवून मतदार मतदानासाठी बाहेर पडले. एकाच वेळी मतदार आल्याने मतदान केंद्रांवर रांगा लागल्याचे ही दिसून आले. सर्वसाधारण असलेल्या करकंब, भोसे, गोपाळपूर, वाखरी व कासेगाव जिल्हा परिषद गटामध्ये भाजप आणि राष्ट्रवादी कॉंग्रेसच्या कार्यकर्त्यांमध्ये उत्साह दिसून येत होता.

तथापि राखीव असलेल्या गटात मात्र शांतता दिसून आली. सकाळी भोसे येथे मतदान सुरू होण्यापूर्वी अज्ञाताने मोटारसायकल जाळली. यानंतर गावात काही वेळ तणाव निर्माण झाला होता. पोलिसांनी वेळीच घटनास्थळी येऊन पाहणी केली. दुपारी करकंब येथे भाजपचे उमेदवार आदिनाथ देशमुख आणि आमदार अभिजित पाटील यांचे बंधू अमर पाटील यांच्यात शाब्दीक खडाजंगी झाली. त्यामुळे दोन्ही गटाचे कार्यकर्ते आमने सामने आले होते. त्यातूनच कार्यकर्त्यांमध्ये बाचाबाचीही झाली. त्यानंतर मतदान केंद्राबाहेर काही वेळ तणाव निर्माण झाला होती. पोलिसांनी वेळीच हस्तक्षेप करून परिस्थती नियंत्रणात ठेवली.

प्रमुख नेत्यांनी केले मतदान

जिल्हा परिषद व पंचायत समिती निवडणुकीसाठी आज तालुक्यातील प्रमुख नेत्यांनी आपापल्या गावी जाऊन मतदानाचा हक्क बजावला. यामध्ये आमदार अभिजित पाटील यांनी देगाव येथे, माजी आमदार प्रशांत परिचारक यांनी खर्डी येथे तर कल्याणराव काळे यांनी वाडीकुरोली येथे मतदानाचा हक्क बजावला.