Gore On Prabhakar Deshmukh : खंडणी प्रकरणी प्रभाकर देशमुखांची चौकशी?; गोरेंची बोलकी प्रतिक्रिया, म्हणाले, ‘त्यासंदर्भात बोलण्याविषयी माझ्याकडे खूप काही; पण...’

Solapur, 03 April : ग्रामविकास मंत्री जयकुमार गोरे यांना खंडणी मागितल्याच्या प्रकरणात माजी सनदी अधिकारी प्रभाकर देशमुख यांची चौकशीसाठी करण्यासाठी दहिवडी पोलिस पुण्यातील त्यांच्या घरी गेले होते. मात्र, ते घरी नसल्याने पोलिसांना माघारी परतावे लागले. मात्र, देशमुख यांच्या गाडीच्या चालकाला पोलिसांनी बुधवारी रात्री ताब्यात घेतल्याची माहिती आहे. त्यावर मंत्री गोरे यांची प्रतिक्रिया आली असून त्याबाबत बोलण्याविषयी माझ्याकडे खूप काही आहे, असे त्यांनी म्हटले आहे.

पालकमंत्री जयकुमार गोरे हे आज सोलापूरच्या दौऱ्यावर होते. माध्यमांशी बोलताना गोरे यांना खंडणी प्रकरणात माजी सनदी अधिकारी प्रभाकर देशमुख (Prabhakar Deshmukh ) यांच्या चौकशीबाबत प्रश्न विचारण्यात आला. त्या वेळी मंत्री गोरे म्हणाले, ‘ त्या प्रकरणासंदर्भात मुख्यमंत्र्यांनी बऱ्याच गोष्टी स्पष्ट केल्या आहेत. त्याबाबत आत्ता पोलिस तपास सुरू आहे. त्याबाबत बोलण्याविषयी माझ्याकडे खूप काही आहे. पण मी आता बोलणार नाही.’

खंडणी प्रकरणात अजून तपास सुरू आहे. पोलिसांना त्यांचा तपास करू द्या. त्यामध्ये जे काही आहे, ते बाहेर येऊ द्या. ते बाहेर आल्यानंतर मी त्या संदर्भात भूमिका मांडणार आहे. पोलिस आज तपास करत आहेत, त्यांना तपास करू द्या. त्यानंतर मी सविस्तर बोलणार आहे, असे जयकुमार गोरे (Jaykumar Gore) यांनी स्पष्ट केले.

दरम्यान, दहिवडी पोलिस माजी सनदी अधिकारी प्रभाकर देशमुख यांच्या कोरेगाव पार्क येथील घरी आले होते. मात्र, त्यापूर्वीच देशमुख हे घरातून बाहेर पडले होते. मात्र, देशमुख यांच्या कुटुंबीयांकडे चौकशी करून पाेलिस निघून गेले आहेत. दहीवडी पोलिसांनी पुण्यातील कोरेगाव पार्क पोलिसांच्या मदतीने हा तपास केला आहे. मात्र, त्यांच्या हाती काय लागले, याची माहिती मिळू शकलेली नाही.

माजी सनदी अधिकारी प्रभाकर देशमुख यांच्या गाडीच्या चालकाला बुधवारी (ता. 02 एप्रिल) रात्रीच पोलिसांनी ताब्यात घेतल्याची माहिती आहे. त्यानंतर दुसऱ्या दिवशी पोलिस प्रभाकर देशमुख यांच्या घरी पोचल्याने या प्रकरणाची जोरदार चर्चा सुरू आहे. पोलिसांच्या हाती देशमुख यांच्यासंदर्भात काही लागले आहे का, त्यातूनच त्यांनी चौकशीचे पाऊल उचलले आहे का, असे सवाल उपस्थित होत आहेत.