Pune News : केंद्रीय रस्ते वाहतूक मंत्री नितीन गडकरी यांच्या पुणे दौऱ्याच्या वेळी, बंदोबस्तावर असणाऱ्या महिला पोलीस अधिकाऱ्याचा विनयभंग भाजप पदाधिकांकडून झाला असल्याचा समोर आला आहे. या प्रकरणी पुणे भाजपचे पदाधिकारी प्रमोद कोंढरे यांचा शिवसेनेने तीव्र निषेध केला आहे. तसेच कोंढरे यांना आलेला सत्तेचा माज आम्ही निश्चित उतरवू, अशी घणाघाती टीका शिवसेना पक्षाचे महानगरप्रमुख रवींद्र धंगेकर यांनी केली आहे.
विधानसभा निवडणुकीमध्ये पराभव पत्करावा लागल्यानंतर रवींद्र धंगेकर यांनी काँग्रेसला सोडचिठ्ठी दिली. त्यांनी महायुतीतील मित्रपक्ष असलेल्या एकनाथ शिंदे यांच्या शिवसेनेमध्ये प्रवेश केला. त्यानंतर आक्रमक प्रतिमा असलेले रवींद्र धंगेकर तीव्र टीका कारणं टाळतं होते. मात्र पोलीस अधिकारी महिलेचा भाजप पदाधिकाऱ्यांकडून विनयभंग झाल्यानंतर रवींद्र धंगेकर यांनी मित्र पक्षावर निशाणा साधला आहे. तर भाजप आमदार हेमंत रासने यांना या प्रकरणावरून मौन सोडण्याचा सल्ला दिला आहे.
याबाबत बोलताना रवींद्र धंगेकर म्हणाले, महाराष्ट्रात युतीचे सरकार आहे. त्याचे आम्हाला भान आहे. मात्र, पुण्यातील भाजपचा पदाधिकारी ड्युटीवर असणाऱ्या महिला पोलीस अधिकाऱ्याचा विनयभंग करत असेल, तर राजमाता जिजाऊ, छत्रपती शिवाजी महाराज, क्रांतीज्योती सावित्रीबाई फुले यांच्या या पुण्यात शिवसेना गप्प बसणार नाही.
या संदर्भात पोलिसात गुन्हा दाखल झाला असून पुण्यातील भाजपच्या पदाधिकाऱ्याचा माज आम्ही उतरवू असे, असाही इशारा रवींद्र धंगेकर यांनी दिला आहे. यापूर्वी देखील याच भाजप पदाधिकारी असणाऱ्या प्रमोद कोंढरे याने राष्ट्रवादी काँग्रेसच्या वैशाली नागवडे यांचाही विनयभंग केला होता आणि त्याच्यावर गुन्हा ही नोंदवण्यात आल्याचेही धंगेकर म्हणाले.
आता या गुन्ह्यासह त्याही प्रकरणाचा पाठपुरावा शिवसेनेतर्फे आम्ही करू. हे प्रकरण दाबले जाणार नाही, याची ग्वाही आम्ही पुणेकरांना देतो. या स्त्रीलंपट प्रमोद कोंढरे सारख्या पदाधिकाऱ्याला, मित्रपक्ष भाजपने पक्षातून त्वरित काढून टाकावे अशीही मागणी धंगेकर यांनी केलीय. याप्रसंगी कसब्याचे भाजपचे आमदार हेमेंत रासने उपस्थित होते. त्यांनी या बाबतीतचे मौन सोडवे असेही आव्हान धंगेकर यांनी केले.
केवळ पुण्यातच नव्हे तर देशात महिला सुरक्षित राहिल्या पाहिजे, ही शिकवण हिंदू हृदयसम्राट आदरणीय बाळासाहेब ठाकरे आणि धर्मवीर आनंद दिघे यांनी दिली असून, उपमुख्यमंत्री एकनाथ शिंदे यांनीदेखील महिलांच्या सुरक्षेबाबत अतिशय कडक धोरण स्वीकारले आहे. त्यामुळेच, वेळप्रसंगी युतीचाही विचार न करता, महिला पोलीस अधिकाऱ्याचा विनयभंग करणाऱ्या भाजप पदाधिकाऱ्याचा माज उतरवून. पुण्यातील समस्त महिला वर्गाला आम्ही आधार देवू, त्यासाठी वेळप्रसंगी तीव्र आंदोलन करू, अशीही ग्वाही रवींद्र धंगेकर यांनी यावेळी दिली.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.