Pune Metro : पुणेकरांना दिवाळीचे ‘मेट्रो गिफ्ट’! हिंजवडी ते शिवाजीनगर मेट्रोचा मुहूर्त ठरला; पुढच्या महिन्यात होणार उद्घाटन

Pune Metro Update : माण-हिंजवडी ते शिवाजीनगर मेट्रो सेवा सुरू होण्याची प्रतीक्षा अखेर संपणार आहे. दिवाळीपूर्वी ही मेट्रो सेवा प्रवाशांसाठी खुली होणार आहे. देशाचे पंतप्रधान नरेंद्र मोदी यांच्या हस्ते ३ नोव्हेंबरला ऑनलाइन पद्धतीने या सेवेचे उद्घाटन होणार असल्याची माहिती सूत्रांनी दिली. याच कार्यक्रमात नळ स्टॉप–वारजे–माणिकबाग, खडकवासला–खराडी, वनाज–चांदणी चौक आणि रामवाडी–वाघोली या मेट्रोच्या विस्तारित मार्गांचे भूमिपूजनही करण्यात येणार आहे.

हिंजवडी आयटी पार्कला पुण्याच्या मध्यवर्ती भागाशी जोडणाऱ्या या मेट्रो सेवेची पुणेकरांसह आयटी कर्मचाऱ्यांना मोठी प्रतीक्षा होती. दरम्यान आता या मार्गावर प्रवासी वाहतूक सुरू करण्यास २३ जुलै रोजी मेट्रो रेल्वे सुरक्षा आयुक्तांनी मंजुरी दिली. त्या प्रमाणे आता माण स्थानक ते आर. के. लक्ष्मण संग्रहालय (बालेवाडी) स्थानकादरम्यानच्या १२ स्थानकांवर मेट्रो धावणार आहे.

आणखी पाच स्थानकांचे काम पूर्ण झाले असून या स्थानकांची तपासणीही करण्यात आली आहे. सप्टेंबरमध्ये या पाच स्थानकांवरील प्रवासी सेवेलाही मंजुरी मिळाली आहे. यामुळे माण-हिंजवडी ते शिवाजीनगर या संपूर्ण मार्गावर सेवा सुरू करण्याचा मार्ग आता मोकळा झाला आहे.

दरम्यान पुणे महानगर प्रदेश विकास प्राधिकरणाने (पीएमआरडीए) मेट्रो सेवेच्या उद्घाटनासाठी राज्य सरकारला माहिती दिली असून तसे पत्र पाठवले होते. ज्यानंतर पंतप्रधान नरेंद्र मोदी यांच्या हस्ते उद्घाटन करण्याचे नियोजन होते. मात्र, पदवीधर आणि शिक्षक मतदारसंघांच्या निवडणुकांची घोषणा सप्टेंबरमध्ये झाल्याने आचारसंहिता लागू झाल्याने ते शक्य झाले नाही. आचारसंहिता २७ ऑक्टोबरपर्यंत असणार आहे.

यामुळे ३ नोव्हेंबर रोजी पंतप्रधान नरेंद्र मोदी यांच्या बारामती दौऱ्यादरम्यान मेट्रो सेवेचे उद्घाटन करण्याचे नियोजन राज्य सरकारचे होते. पण हा दौरा स्थगित झाल्याने आता मोदी ऑनलाइन पद्धतीने मेट्रो सेवेचे उद्घाटन करण्यात येणार आहे. तर यावेळी मुख्यमंत्री देवेंद्र फडणवीस यांच्या उपस्थितीत हा कार्यक्रम बालेवाडी येथे होणार आहे.

माण-हिंजवडी ते शिवाजीनगर मेट्रो मार्गावरील १७ स्थानकांवरील प्रवासी सेवेला मंजुरी मिळाली आहे. या प्रकल्पाच्या कामासाठी पुढील वर्षी मार्चअखेरपर्यंत मुदतवाढ देण्यात आली आहे. मार्गावरील उर्वरित सहा स्थानकांची कामे डिसेंबरअखेरपर्यंत पूर्ण करण्याचे नियोजन आहे. त्यामुळे पुढील वर्षी या मार्गावरील सर्व स्थानकांवर मेट्रो सेवा सुरू होण्याची शक्यता असल्याचे सूत्रांनी सांगितले.