NCP SP Politics : पेशवाई नको म्हणत... शरद पवारांच्या पक्षाने सुचवली पुणे स्थानकासाठी पाच नावं

Pune News : पुणे रेल्वे स्थानकाचे नामांतर करण्याची मागणी भाजपकडून करण्यात आली आहे. पुणे रेल्वे स्थानकाला थोरले बाजीराव पेशवे यांचे नाव द्यावं, अशी मागणी भाजपच्या राज्यसभेच्या खासदार मेधा कुलकर्णी यांनी केली आहे. त्यांच्या या मागणीनंतर आता राजकीय वर्तुळातून वेगवेगळ्या प्रतिक्रिया येताना पाहायला मिळत आहेत. या नावाला राष्ट्रवादी काँग्रेस शरदचंद्र पवार पक्षाकडून विरोध दर्शवण्यात आला असून पक्षाकडून रेल्वे स्थानकासाठी काही नावं देखील सुचवण्यात आली आहेत. (Pune Railway Station renaming controversy involving BJP’s Medha Kulkarni and NCP SP)

खासदार मेधा कुलकर्णी यांनी थोरले बाजीराव पेशवे यांनी छत्रपती शिवाजी महाराजांनी स्थापलेल्या स्वराज्याचा भव्य विस्तार केला. त्यांनी हिंदवी स्वराज्याचा कटक ते अटक असा व्यापक फैलाव केला. शनिवारवाडा हे त्यांच्या पराक्रमाचे आणि स्वराज्याच्या वैभवाचे प्रतीक आहे. पुणे हे त्या काळात स्वराज्याचे प्रमुख केंद्र होते. त्यामुळे पुणे रेल्वेस्थानकाला थोरले बाजीराव पेशवे यांचे नाव देण्यात यावं, अशी मागणी केलीय.

या मागणीनंतर आता राष्ट्रवादी काँग्रेस शरदचंद्र पवार पक्षाचे शहराध्यक्ष प्रशांत जगताप यांनी आपला आक्षेप नोंदवला आहे. प्रशांत जगताप म्हणाले, ज्या मेधा कुलकर्णी पुण्यातून सर्वप्रथम नगरसेवक, त्यानंतर आमदार आणि आता खासदार झाल्या आहेत, त्यांनी थोडं ब्रॉड माइंडेड असणं अपेक्षित आहे.

ज्या महापुरुषांनी पुण्यासाठी खूप काही योगदान दिलं आहे. ज्यांनी समतेचा विचार दिला आहे. अशा वेगवेगळ्या नेत्यांची नावे पुणे रेल्वे स्थानकासाठी सुचवणं अपेक्षित होतं. मात्र तसं न करता पुन्हा एकदा पुण्यात पेशवाईचा संदेश देणे हे कितपत संयुक्तिक आहे? याचा विचार मेधा कुलकर्णी यांनी करणं अपेक्षित होतं.

या मागणीमुळे भाजपचा ओठात काय आणि पोटात काय आहे? हे समोर आलं आहे. महात्मा ज्योतीराव फुले, क्रांतीज्योती सावित्रीबाई फुले, धर्मवीर संभाजी महाराज, लोकशाहीर अण्णाभाऊ साठे आणि डॉक्टर बाबासाहेब आंबेडकर यासारखी खूप सारी नावं असताना देखील मेधा कुलकर्णी यांनी थोरले पेशव्यांच्या नावावर आग्रही आहेत. यातूनच भाजपला पुण्यात पुन्हा पेशवाई आणायची आहे का? असा प्रश्न उपस्थित होत असल्याचीही टीका जगताप यांनी केलीय.