Sangli Bank Election : गोपीचंद पडळकरांची कसोटी, पाटील विरुद्ध पाटील लढतीकडे लक्ष! सांगली जिल्हा बँकेसाठी मतदान सुरू

Gopichand Padalkar News : सांगली जिल्हा बँकेसाठी आज मतदान पार पडत आहे. 21 जागा असलेल्या या बँकेतील 15 जागा बिनविरोध झाल्या आहेत. मात्र, सहा जागांसाठी आज मतदानाला सुरुवात झाली आहे. यामध्ये जत गटातून आमदार गोपीचंद पडळकर यांचा कस लागणार आहे. जत गटात पडळकर विरुद्ध विनोद पवार यांच्यात मुख्य लढत होत आहे.

तासगाव गटात देखील माजी खासदार संजयकाका पाटील विरुद्ध माजी आमदार सुमन आर पाटील यांच्यामध्ये लढत होत आहे. माजी आमदार विरुद्ध माजी खासदार यांच्यामध्ये कोण बाजी मारणार याकडे लक्ष असणार आहे. तीन नोव्हेंबरला या निवडणूकीचा निकाल जाहीर होणार आहे. दरम्यान, आज जिल्ह्यातील 12 मतदान केंद्रांवर मतदान पार पडते आहे.

कवठेमहांकाळ विकास सोसायटी गटातून माजी राज्यमंत्री अजित घोरपडे आणि तानाजी पाटील यांच्यात लढत होत आहे. मिरजेत आण्णासाहेब कोरे- अनिल शेगुणशी यांच्यात लढत होत आहे.

सातारा बँकेसाठी मतदान

सातारा जिल्हा मध्यवर्ती सहकारी बँकेच्या निवडणुकीसाठी आज १२ जागांवर मतदान होत आहे. या निवडणुकीत मंत्री शंभूराज देसाई, मंत्री जयकुमार गोरे यांच्यासह अनेक बड्या नेत्यांची प्रतिष्ठा पणाला लागली आहे. २१ जागांपैकी ९ जागा यापूर्वीच बिनविरोध झाल्या असून, उर्वरित १२ जागांसाठी आज सकाळी ८ ते सायंकाळी ५ या वेळेत मतदान होणार आहे.

साताऱ्यातील प्रमुख लढती

सातार जिल्हा बँकेत सातारा जिल्ह्याचे पालकमंत्री शंभूराजे देसाई विरुद्ध सत्यजितसिंह पाटणकर, राज्याचे ग्रामविकास मंत्री जयकुमार गोरे विरुद्ध जिल्हा मध्यवर्ती सहकारी बँकेचे माजी संचालक आणि त्यांचे बंधू शेखर गोरे, रामराजे नाईक निंबाळकर यांचे बंधू संजीव राजे नाईक निंबाळकर विरुद्ध माजी खासदार निंबाळकर रणजितसिंह नाईक निंबाळकर यांचे बंधू समशेरसिंह नाईक निंबाळकर या लढतीकडे राज्याचे लक्ष लागून राहिले आहे.