Sangli ZP Result : जयंत पाटलांकडून भाजपचा टप्प्यात कार्यक्रम; बहुमत जुळवताना चंद्रकांतदादांची होणार दमछाक; मविआ सत्तेत?

Sangli ZP Election : जिल्हा परिषद निवडणुकीत भाजपने मोठा विजय मिळवला आहे. सातारा, कोल्हापूर, या पश्चिम महाराष्ट्रातील जिल्हा परिषदांवर भाजपची सत्ता येणार हे निश्चित झाले असताना जयंत पाटलांनी भाजपचा सांगली जिल्हा परिषदेमध्ये टप्प्यात कार्यक्रम केला आहे.

सुसाट निघालेल्या भाजपला सांगलीत ब्रेक लागला. सांगली जिल्हा परिषदेमध्ये 61 जागा आहेत. तेथे भाजप स्वबळावर सत्ता स्थापन करेल अशी चर्चा होती. मात्र, राष्ट्रवादी काँग्रेस शरदचंद्र पवार पक्ष आणि काँग्रेसने जोरदार फाईट देत या निवडणुकीत रंगत वाढवली आहे.

सांगली जिल्हा परिषदेतील 61 पैकी 59 जागांचे निकाल हाती आले आहेत. त्यामध्ये राष्ट्रवादी काँग्रेस शरदचंद्र पवार पक्षाचे 17 उमेदवार विजयी झाले आहेत. तर, काँग्रेसचे 11 उमेदवार विजयी झाले आहेत. तर, ठाकरेंच्या शिवसेनेचा 1 उमेदवार विजयी झाला आहे. त्यामुळे महाविकास आघाडी एकत्र आली तर त्यांची संख्या 29 होते.

भाजप 16 जागांवर विजयी झाली आहे. अजित पवारांच्या राष्ट्रवादीला 5 जागा आणि शिंदेच्या शिवसेनेला 7 तर जनसुराज्यला 1 जागा मिळाली आहे. त्यामुळे महायुती एकत्र आली तर त्यांचे संख्याबळ देखील 29 होते. त्यामुळे सत्तास्थापन करताना मोठी कसोटी लागणार आहे.

दोन जागांचे निकाल बाकी

भाजप आणि राष्ट्रवादी काँग्रेसमध्ये काटे की टक्कर सुरू असताना अजून दोन जागांवरील निकाल बाकी आहेत. बहुमताचा आकडा हा 31 आहे.त्यामुळे त्या दोन जागांवर जो पक्ष विजय मिळवेल तो सत्ता स्थापन करण्याचा प्रमुख दावेदार असेल. मिळालेल्या माहितीनुसार या दोन्ही जागांवर राष्ट्रवादी काँग्रेस शरदचंद्र पवार पक्षाचे उमेदवार आघाडीवर आहेत. मात्र अंतिम निकाल जाहीर झालेला नाही.

चंद्रकांत पाटलांची कसोटी

सांगलीचे पालकमंत्री चंद्रकांत पाटील आहे. महायुती आणि महाविकास आघाडीमध्ये अंतिम निकालात जागांचे अंतर अगदीच कमी राहण्याची शक्यता आहे. त्यामुळे मित्र पक्षांच्या मागण्या मान्य करून सत्ता स्थापन करण्यासाठी चंद्रकांत पाटलांची कसोटी लागणार असल्याची चर्चा आहे.

61 पैकी 59 जागांचे निकाल

भाजपा - 16

राष्ट्रवादी अजित पवार - 05

शिंदेसेना - 07

काँग्रेस - 11

राष्ट्रवादी शरद पवार - 17

शिवसेना ठाकरे पक्ष - 01

रयत क्रांती संघटना - 01

जनसुराज्य शक्ती पक्ष - 01