ShahajiBapu Patil : शहाजीबापूंनी सांगितली सांगोला नगराध्यक्ष उमेदवारीची इनसाईड स्टोरी; जयकुमार गोरेंनी काय दिली होती ऑफर...

1. शहाजीबापू पाटील यांनी सांगोल्यातील उमेदवारी प्रक्रियेत निर्माण झालेली गोंधळाची स्थिती उघड केली, ज्यात त्यांना योग्य उमेदवार मिळत नसल्याने अनेकांना विनंती करूनही नकार मिळाला, तर विविध पक्षांतून वेगवेगळ्या नावांची घोषणा होत राहिली.

2. महा युतीतील अंतर्गत मतभेद, विशेषत: भाजप, शेकाप आणि शिवसेना (शिंदे गट) यांच्यात नगराध्यक्षपदासाठी कोणत्या चिन्हावर लढायचे यावर मोठी तणावपूर्ण परिस्थिती निर्माण झाल्याचे त्यांनी सांगितले.

3. जयकुमार गोरे आणि एकनाथ शिंदे यांच्यासोबतच्या चर्चेचे तपशील देत, गोरे यांनी ‘कमळ’ चिन्हावरच उमेदवार हवा अशी अट घातली, तर शहाजीबापूंना भाजपकडून मिळालेल्या प्रतिसादाअभावी ते एकाकी पडल्याची भावना निर्माण झाली, असे त्यांनी स्पष्ट केले.

Solapur, 29 November : सांगोला नगरपरिषद नगराध्यक्षपदासाठी मी पहिल्यांदा उमेदवार जाहीर केला नव्हता. आरक्षण जाहीर झाल्यानंतर शिवाजी बनकर यांनी आपली उमेदवारी प्रथम जाहीर केली. ते पंधरा दिवस नाव चालत राहिले. माझ्याकडं प्रबळ उमेदवार नव्हता. कारण आनंदा मानेंची उभं राहण्याची इच्छा नव्हती. त्यांना मी अनेकदा विनंती केली. मात्र, ते तयार झाले नाहीत. मी अनेक लोकांना विचारले पण, कोणीही तयार झाले नाही. प्रा. झपके सरांना विनंती केली होती. मात्र सांगतो म्हणण्यात त्यांनी दीड महिना घालवला, असे शिवसेनेचे माजी आमदार शहाजीबापू पाटील यांनी सांगितले.

शहाजीबापू पाटील (ShahajiBapu Patil) म्हणाले, एकाच बाजूने दीपक साळुंखेंचा () उमेदवार फिरत गेला, त्यामुळे शिवसेनेचा उमेदवार का नसावा म्हणून आनंदा माने यांना शहरात फिरायला सुरुवात करा. शेकापने पहिल्यांदा त्यांचा अधिकृत उमेदवार जाहीर केला. शेकापच्या पक्ष कार्यालयात झालेल्या बैठकीत डॉ. बाबासाहेब देशमुख यांनी भाषण केले आणि त्यात त्यांनी शेकाप स्वबळावर निवडणूक लढवेल आणि आपले उमेदवार मारुती बनकर असतील, अशी त्यांनी घोषणा केली.

नगरपरिषद निवडणुकीच्या अनुषंगाने मी एकच बैठक घेतली. त्या बैठकीला भाजपचे (BJP) जिल्हाध्यक्ष चेतनसिंह केदार, रिपब्लिकन पक्षाचे पदाधिकारी होते. त्या बैठकीत मी महायुती म्हणून आपण मजबुतीने निवडणूक लढवायची, वॉर्डनिहाय उमेदवार शोधायला सुरुवात करा, असे मी सांगितले, असेही त्यांनी नमूद केले.

ते म्हणाले, सांगोल्यात अशा काही घटना घडल्या की मी थोडं अंधारात राहिलो. पालकमंत्री जयकुमार गोरेंना त्यांच्या कार्यालयात जाऊन विचारलं होतं की,निवडणूक आली आहे काय करायचं. त्यावर त्यांनी तुम्ही आणि आमदार डॉ. बाबासाहेब देशमुख एकत्र या, असं सांगितलं. मी त्यांना चालतंय असं सांगून मी आणि गणपतराव देशमुख यांनी एकत्र काम केल्याचाही दाखला दिला. बाबासाहेबांची इच्छा आहे की नाही. कारण त्यांची विचारधारा धर्मनिरपेक्ष मानतात. त्यामुळे ते येतात की नाही, याबाबत शंका आहे.

त्याच बैठकीत मी दीपक साळुंखेंना सोबत घेऊ, असं सांगितलं. तेव्हा जयकुमार गोरेंनी अजिबात नाही, त्याला जागा कुठून द्यायच्या, असे सांगितले. तुम्ही, डॉ. बाबासाहेब देशमुख आणि भाजप अशी आपण निवडणूक लढवू, असे गोरे म्हणाले. पण एक टप्पा असा आला की भाजपच्या चिन्हावर नगराध्यक्ष करायचा, असा जयाभाऊंनी आग्रह धरला. मला धनुष्यबाणाचा झाला पाहिजे, असं पक्ष म्हणतोय, असेही शहाजी पाटील यांनी नमूद केले.

माजी आमदार पाटील म्हणाले, मी एकनाथ शिंदे यांना जाऊन भेटलो आणि वेळ पडली भाजप आणि आम्ही वेगळं चिन्ह घ्यावं का, अशी विचारणा केली. त्या वेळी त्यांनी एका मिनिटांत घ्या म्हणून सांगितलं. आपली काही अडचण नाही, तुम्ही आणि जयकुमार गोरे मिळून करताय अशी विचारणा एकनाथ शिंदे यांनी केली. त्यानंतर मी जयकुमार गोरेंना एक उमेदवार देऊ असं सांगितलं. त्यावर त्यांनी नाही म्हटलं. मला जर देवेंद्र फडणवीस यांनी सांगितलं तर देईन नाही तर मी स्वतः बोलणार नाही, असे त्यांनी म्हटले.

तुम्ही मंत्री असून तुम्हा दोन दोन दिवस भेट होत नाही. माझी कशी भेट होणार, अशी मी त्यांना विचारणा केली. त्यावर गोरेंनी तुम्ही काहीही करा, असं सांगितलं. मी वर्षा बंगल्यावर फडणवीसांना भेटायला गेलाे. पण मला आतमधून काही बोलावणं आलं नाही. तुम्ही उद्या या असं सांगण्यात आले. त्यानंतर मी एकाकी पडतोय हे लक्षात आल्याने मी तातडीने सांगोल्याला आलो, असेही शहाजीबापूंनी नमूद केले.

‘कमळाच्या चिन्हावर लढा’

जयकुमार गोरे यांनी मला ऑफर दिली होती. त्यात शहाजीबापू सांगतील तो उमेदवार पण त्याने कमळाच्या चिन्हावर लढलं पाहिजे, अशी अट घातली होती, असा गौप्यस्फोट माजी आमदार शहाजी पाटील यांनी केला.

1. प्र. शहाजीबापू पाटील यांना उमेदवार शोधताना अडचण का आली?
   उ: अनेक संभाव्य उमेदवारांनी निवडणूक लढण्यास नकार दिला.

2. प्र. महायुतीत मतभेद कशावर झाले?
   उ: नगराध्यक्ष पदासाठी कोणत्या पक्षाच्या चिन्हावर लढायचे यावर.

3. प्र. जयकुमार गोरे यांनी कोणती अट घातली होती?
   उ: उमेदवार ‘कमळ’ (भाजप) चिन्हावरच लढला पाहिजे.

4. प्र. शहाजीबापूंना भाजपकडून कोणती अडचण आली?
   उ: फडणवीसांना भेटण्याचा प्रयत्न असूनही त्यांना भेट मिळाली नाही आणि त्यामुळे ते राजकीयदृष्ट्या एकाकी पडल्यासारखे