Omraje Nimbalkar : मतं विकत घेणाऱ्यांचे पैसे घ्या; पण त्याला असा पाडा की त्याचा माज जिरला पाहिजे : बार्शीत ओमराजे कडाडले

1. ओमराजे निंबाळकर यांनी बार्शी निवडणुकीत विरोधकांचे पैसेवाटपाचे राजकारण उघड करत मतदारांनी अशा प्रवृत्तीला जोरदार प्रत्युत्तर द्यावे, असे आवाहन केले.

2. सभेत त्यांनी सरकारचा पैसा हा जनतेचाच असल्याचे स्पष्ट करत विरोधी पक्षात असूनही विकासकामे केली असल्याचा उल्लेख केला.

3. लोहमार्ग आणि चौपदरीकरणाच्या कामांचा उल्लेख करत त्यांनी काही स्थानिक आमदारांवर नाव न घेता राजकीय टोले लगावले.

Barshi, 29 November : लोकसभा आणि विधानसभा निवडणुकीत विरोधकांचा सुफडा साफ झाला आहे. त्याचीच पुनरावृत्ती बार्शीत येत्या दोन डिसेंबरला बार्शीत विरोधकांचा सुफडा साफ करायचा आहे. राणे बंधूंमध्ये पैसे वाटपावरून कळवंडी सुरू झाल्या आहेत. इथला (बार्शी) काय आकडा फुटला की नाही. तुम्ही लोकसभेला नादच पुरा केला आहे. बार्शीत दोन हजारांचा आकडा फुटल्याची चर्चा आहे. पैशाचा नाद करून कोणी आपलं मत विकत घेत असेल तर त्याची माज जिरवण्यासाठी प्रचंड पैसे घ्यायचे अन्‌ त्याला असा पाडायचं की त्याची पैसे वाटपाची तल्लफच फिटली पाहिजे, असे आवाहन खासदार ओमराजे निंबाळकर यांनी केले.

बार्शी (Barshi) नगरपालिका निवडणुकीत शिवसेना उद्धव बाळासाहेब ठाकरे पक्षाच्या प्रचारार्थ सभा झाला. त्या सभेला आमदार दिलीप सोपल, विश्वास बारबोले, निर्मला विश्वास बारबोले आणि नगरसेवकपदाचे उमेदवार उपस्थित होते.

ओमराजे निंबाळकर (Omraje Nimbalkar) म्हणाले, लोकांमध्ये संभ्रम निर्माण होऊ नये, यासाठी मशाल चिन्ह घेण्याची विनंती विश्वास बारबोले यांना केली होती. प्रसंगी शरद पवार यांना बोलतो, असेही सांगितले होते. त्यांनीही मोठ्या मनाने माझी विनंती मान्य केली. पुढाऱ्याचा स्वभाव बदलत नसतो, जनतेला ते काहीही नाही म्हणत नाहीत. पण देत काहीच नाहीत.

अलीकडं टूम आली आहे की, सरकार आमचं आहे. आमच्याकडं पैसा आहे, असं सांगितलं जात आहे. पण, हा पैसा जनतेचा आहे. प्रत्येक वस्तूंवर जीएसटी आहे. जनतेचा पैसा सरकार तुमच्यासाठी खर्च करतंय. मग आम्ही फुकटचं भूषण हाणायचं का? लोकप्रतिनिधीचं ते कर्तव्य आहे. सरकारचं आमचं आहे, तुम्ही विरोधी पक्षात आहे, तुम्हाला निधी देणार नाही, असे सांगितलं जात आहे. मग निधी काय तुमच्या बापाचा आहे का? लोकसंख्येच्या प्रमाणात निधी द्यावाच लागतो. मतं टाकणाऱ्याला आणि न टाकणाऱ्यालाही मी मदत करेन, असेही खासदार निंबाळकर यांनी नमूद केले.

ओमराजे म्हणाले, मी विरोधी पक्षाचा खासदार असतानाही टेंभुर्णी ते लातूर चौपदरीकरणाचा डीपीआर मंजूर झाला आहे. टेंडर फायनल झालं आहे. येत्या दोन वर्षांत या रस्त्याचे चौपदीकरण होईल. पण तुम्ही स्पीड ब्रेकर्सची मागणी करू नका. तुम्हाला स्पीड ब्रेकर्सचा लय नाद आहे गड्या.

‘हे लयंच भान गेल्यासारखं करायला लागलंय’

सोलापूर-तुळजापूर-धाराशिव लोहमार्गाचे काम पाठपुरावा करून मी चालू केलं. पण तिथला आमदार मला काय सोडतच नाही. त्याच्याकडं नारळानं भरलेले पोत्याचे एक गाठोडेच आहे. घेतंय नारळ ही हाणतंय कुचा. तुळजापूरच्या लोकांना काल सांगितलं की तुमच्या आमदाराला जरा समजावून सांगा. हे लयंच भान गेल्यासारखं करायला लागलंय, असा टोलाही त्यांनी नाव न घेता आमदार राणाजगजितसिंह पाटील यांना लगावला.

1. प्र. ओमराजे निंबाळकर यांनी कोणत्या मुद्द्यावर टीका केली?
   उ: निवडणुकीत पैसे वाटप करून मतं विकत घेण्याच्या प्रवृत्तीवर.

2. प्र. सभेचा उद्देश काय होता?
   उ: शिवसेना (उद्धव बाळासाहेब ठाकरे) पक्षाच्या उमेदवारांच्या प्रचारासाठी.

3. प्र. त्यांनी कोणते विकासकाम उल्लेखले?
   उ: टेंभुर्णी–लातूर चौपदरीकरण आणि सोलापूर–तुळजापूर–धाराशिव लोहमार्ग.

4. प्र. त्यांनी कोणावर अप्रत्यक्ष टीका केली?
   उ: आमदार राणाजगजितसिंह पाटील यांच्यावर.