Chandgad Politics : "फडणवीसच म्हणाले चंदगडमधून आपला शिवाजी निवडून आला..."; कुपेकरांच्या टीकेला आमदार शिवाजी पाटलांचं प्रत्युत्तर

Kolhapur News, 06 Aug : गेली 25 वर्षे चंदगड, आजरा, गडहिंग्लजच्या जडणघडणीत काम करत असताना त्यावेळी तुम्ही कोठे होता, याची माहिती मुंबई क्राईम ब्रॅचकडून घ्यावी लागेल. सभेमध्ये माता-भगिनींसमोर एकेरी शब्दात बोलण्याची संस्कृती कोठून आली?

अशा शब्दात भाजपचे कार्यकारणी सदस्य संग्रामसिंह कुपेकर यांनी आमदार शिवाजीराव पाटील यांना टोला लगावला आहे. शक्तीपीठ आंदोलनानंतर झालेल्या आरोप-प्रत्यारोपात आमदार पाटील यांनी केलेल्या टीकेला त्यांनी प्रसिद्धिपत्राद्वारे प्रत्युत्तर दिले आहे.

शक्तिपीठ महामार्गाविरोधात भूमिका घेतल्यामुळे आमदार शिवाजी पाटील यांनी माझ्यासह काही नेत्यांवर अत्यंत खालच्या स्तरावर टीका केली. मतदारसंघाच्या संविधानिक पदावर काम करताना अशाप्रकारची असंसदीय भाषा त्यांना शोभत नाही.

विधानसभा निवडणुकीत दोन वेळा पक्षाच्या विरोधात जाऊन अपक्ष निवडणूक लढवताना त्यांना पक्षनिष्ठा आठवली नाही काय? असा प्रश्न संग्रामसिंह कुपेकर यांनी केला आहे. पत्रकात म्हटले आहे की, 2024 च्या विधानसभा निवडणुकीत पक्षाची उमेदवारी महायुतीतील राष्ट्रवादीच्या वाट्याला जाते, असे वाटल्यावर तुम्ही कोणाकोणाकडे गेला, हे जनतेला माहीत आहे.

उमेदवारी मिळत नाही, असे वाटल्यावर पक्षाच्या वरिष्ठ नेत्यांचे आदेश झुगारून महायुतीच्या विरोधात निवडणूक लढलात. या निवडणुकीत मीही उमेदवारी अर्ज भरला होता. मात्र, वरिष्ठांच्या मर्जीनुसार मित्र पक्षाच्या उमेदवाराच्या पाठीशी राहिलो. मुळात तुम्हीच अपक्ष म्हणून निवडून येऊन बाहेरून भाजपला पाठिंबा दिला आहे.

दरम्यान, या कुपेकराच्या टीकेवर आमदार पाटील यांनी प्रतिक्रिया दिली ते म्हणाले, "विधानसभेचा निकाल जाहीर होताच मुख्यमंत्री देवेंद्र फडणवीस यांनी, चंदगडमधून आपला शिवाजी पाटील निवडून आला’ असे उद्‍गार काढल्याचे संपूर्ण महाराष्ट्राने पाहिले. मी भाजपचा असल्याबाबत यापेक्षा आणखी प्रमाणपत्र कोणते हवे?"