Devendra Fadnavis : CM फडणवीस-एकनाथ शिंदे यांच्यात अधिकारावरून संघर्ष; एकाच पदासाठी दोघांना अतिरिक्त कार्यभाराचे आदेश

Mumbai News : राज्यातील महायुतीचे सरकार स्थापन झाल्यापासून तीनही पक्षात सातत्याने कुरबुरी होत असल्याचे पुढे आले आहेत. त्यामुळे दिवसेंदिवस या तीन पक्षातील मतभेद पुढे आले आहेत. मंत्रिपदापासून सुरु झालेली रस्सीखेच त्यानंतर मलईदार खात्यासाठी चढाओढ पहावयास मिळाली. त्यानंतर नाशिक व रायगड जिल्ह्यातील पालकमंत्री पदावरून तीन पक्षात असलेला वाद अद्याप मिटलेला नसतानाच आता बेस्टच्या अतिरिक्त महाव्यवस्थापक पदावर सीएम फडणवीस आणि उपमुख्यमंत्री एकनाथ शिंदे यांनी दोघांची नियुक्ती करण्यात येत असल्याचे पत्र दिले आहे. त्यामुळे एकाच पदावर दोन व्यक्तींची निवड करण्यात आल्याने संभ्रम वाढला आहे.

राज्यातील महायुती सरकारमध्ये सर्व काही आलबेल नसल्याचा प्रकार पुढे आला आहे. बेस्टच्या अतिरिक्त महाव्यवस्थापकपदासाठी मुख्यमंत्री देवेंद्र फडणवीस (Devendra fadnavis) व उपमुख्यमंत्री एकनाथ शिंदे यांच्याकडून एकाच पदावर दोघांची नियुक्ती केली असल्याचे पुढे आले आहे. तशास्वरुपाचे नियुक्ती पत्र सामान्य प्रशासन व नगरविकास खात्याकडून देण्यात आले आहे. त्यामुळे आता दोघांपैकी कोणाची नियुक्ती होणार याकडे सर्वांचे लक्ष लागले आहे.

गेल्या काही दिवसापासून बेस्टच्या अतिरिक्त महाव्यवस्थापकपद रिक्त आहे. त्यासाठी सीएम फडणवीस यांच्या सामान्य प्रशासन विभागाकडून या पदावर आशिष शर्मा यांच्याकडे अतिरिक्त कार्यभार दिल्याचे पत्र दिले आहे तर दुसरीकडे याच पदावर एकनाथ शिंदे (Eknath Shinde) यांच्या नगरविकास विभागाकडून आश्विनी जोशी यांच्याकडे अतिरिक्त कार्यभार दिल्याचे म्हटले आहे. एकाच पदावर दोन व्यक्तींची निवड करण्यात आल्याने संभ्रम वाढला आहे.

बेस्ट महाव्यवस्थापक पदासाठी अतिरिक्त कार्यभार बीएमसीच्या दोन अतिरिक्त अधिकाऱ्यांकडे देण्यात आल्याने गोंधळ वाढला आहे. आता एकाच दिवशी दोन अधिकाऱ्यांकडे अतिरिक्त कार्यभार दिल्याने कोणाच्या आदेशाचे पालन करायचं असं सुद्धा प्रश्न आता उपस्थित झाला आहे. त्यामुळे मुख्यमंत्री आणि उपमुख्यमंत्री यांच्यात अधिकाऱ्यांवरून सुप्त संघर्ष असल्याचे यावरून या समोर येत आहे.

गेल्या काही महिन्यांपासून उपमुख्यमंत्री एकनाथ शिंदे नाराज असल्याची चर्चा राजकीय वर्तुळामध्ये रंगली आहे. इतकेच नव्हे, तर उपमुख्यमंत्री शिंदे यांच्या मुंबई ते दिल्ली वाढलेल्या गाठीभेटी सुद्धा यामध्ये चर्चा वाढवणाऱ्या ठरत आहेत. या सर्व पार्श्वभूमीवर आता पुन्हा एकदा मुख्यमंत्री फडणवीस आणि एकनाथ शिंदे यांच्यातील सुप्त संघर्ष समोर आला आहे. एकाच पदासाठी एकाच दिवशी दोन आदेश आणि दोघांकडे अतिरिक्त कार्यभाराचा आदेश देण्यात आल्याने या दोन्ही नेत्यांमध्ये सूप्त संघर्षाची ही नांदी आहे का? असा सुद्धा प्रश्न उपस्थित झाला आहे.