Nagpur News:शिवसेनेचे उपनेते आणि आमदार कृपाल तुमाने यांच्या वक्तव्याने सध्या शिवसेना उद्धव बाळासाहेब ठाकरे पक्षात मोठी खळबळ उडाली आहे. दोन आमदार सोडले तर दसरा मेळाव्यानंतर सर्व आमदार शिंदे सेनेत दाखल होणार असल्याचा दावा त्यांनी केला आहे. त्यांना आता नागपूरमधून उद्धव सेनेचे संपर्क प्रमुख सतीश हरडे यांनी जोरदार उत्तर दिले आहे.
तुमाने यांच्या स्टेटमेंटला कोणी महत्त्व देत नाही. माध्यमांशी काही तरी बोलायचे खळबळ उडवून द्यायची हाच त्यांचा हेतू आहे. एकनाथ शिंदे यांच्या नजरेत यावे यासाठी त्यांनी हा खटाटोप केला असल्याचा आरोपही हरडे यांनी केला.
कृपाल तुमाने यांना उद्धव ठाकरे यांनी आतापर्यंत तीन वेळा लोकसभेची उमेदवारी दिली. दोन वेळा ते रामटेक लोकसभा मतदारसंघाचे खासदार होते. एका सामान्य कार्यकर्त्याला खासदार केल्याने खरे तर तुमाने यांनी आयुष्यभर उद्धव ठाकरे यांचे ऋणी राहायला हवे होते. मात्र त्यांनी गद्दारी केली.
शिंदे सेनेत गेले. त्यानंतर त्यांचे तिकीटही कापण्यात आले. शिंदे सेनेत आता त्यांना कोणी विचारत नाही. महत्त्वाचे स्थान नाही. त्यामुळे असे उलटसुलट स्टेटमेंट देऊन ते आपल्याकडे लक्ष वेधून घेण्याचा प्रयत्न करतात. तुमाने यांच्या सांगण्यावरून चार कार्यकर्तेसुद्धा त्यांच्यासोबत शिंदे सेनेत सहभागी झाले नव्हते.
नागपूर जिल्ह्यातून शिंदे सेनेत जायला कोणी तयार नाही. उपमुख्यमंत्री शिंदे विदर्भात आल्यानंतर मेळावे घेतले जातात. त्याच त्या कार्यकर्त्यांचा प्रवेश झाल्याचे दाखवून त्यांची दिशाभूल केली जात आहे.
जे कार्यकर्त्यांच्या त्यांच्या भूलथापांना बळी पडले त्यांचा भ्रमनिरास झाला आहे. ते परत उद्धव सेनेत येत आहेत. नागपूर महापालिकेची निवडणूक लढवण्यासाठी दीडशे उमेदवारसुद्धा शिंदे सेनेकडे नाहीत. या उलट उद्धव सेनेची स्थिती आहे. शेकडो कार्यकर्ते शिंदेसेनाच नव्हे तर विविध पक्षातून आमच्याकडे येण्यास तयार आहे.
पित्रुपक्षामुळे आम्ही प्रवेश समारंभ लांबणीवर टाकला आहे. सरसकट कोणालाही पक्षात घ्यायचे नाही, असे उद्धव ठाकरे यांचे आदेश आहेत. जे कामाचे आहेत, चांगले कार्यकर्ते आहेत, त्यांच्या पक्ष प्रवेशाची यादी मुंबईत पाठवण्यात आली आहे. तिकडून मंजुरी येताच मोठा प्रवेशाचा कार्यक्रम महापालिकेच्या निवडणुकीपूर्वी घेण्यात येणार असल्याच दावाही सतीश हरडे यांनी केला.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.