Ram Satpute : मोहिते पाटलांच्या विरोधात सोलापुरातील नेत्यांचा संकल्प : माजी आमदार राम सातपुतेंनी केला भरसभेत दावा

Solapur, 07 June : विधान परिषद निवडणुकीच्या निमित्ताने माळशिरसचे भाजपचे माजी आमदार राम सातपुते यांनी पुन्हा एकदा मोहिते पाटील यांच्यावर तोफ डागली आहे. विधान परिषदेची निवडणूक पुन्हा लढवायची हिम्मत झाली नाही, अशा प्रकारची वेळ मोहिते पाटील यांच्यावर आणायची, असा संकल्प सोलापूर जिल्ह्यातील सर्वच नेत्यांनी केला आहे, असा दावा सातपुते यांनी केला आहे.

भाजप-महायुतीचे उमेदवार राजेंद्र राऊत यांच्या प्रचारानिमित्त आयोजित सभेत राम सातपुते बोलत होते. विधान परिषद निवडणुकीत मोहिते पाटील यांचा पराभव करायचाच, असा निर्धारही राम सातपुते यांनी बोलून दाखवला.

ते म्हणाले, माजी आमदार राजेंद्र राऊत हे मुख्यमंत्री देवेंद्र फडणवीस यांच्या हक्काचा माणूस आहेत. मोहिते पाटील यांचा पराभव करून राजेंद्र राऊत यांना आपल्याला मोठ्या फरकाने विधान परिषदेवर पाठवायचे आहे.

मोहिते पाटील यांनी पुन्हा निवडणूक लढविण्याची हिम्मत केली नाही पाहिजे, असा संकल्प आमदार समाधान आवताडे, माजी आमदार प्रशांत परिचारक, दोन्ही देशमुख आणि आम्ही सगळ्यांनी केलेला आहे. भाजपच्या विरोधात ह्यांची निवडणूक लढवण्याची हिम्मत झाली नाही पाहिजे, असा दारुण पराभव करण्याची वेळ आली आहे, असेही राम सातपुते म्हणाले.

माजी आमदार सातपुते म्हणाले, आपला विजय झालेला आहे, त्यामुळे राजाभाऊ आम्हाला तुमच्या सत्काराची वेळ द्या. अकलूजच्या विजय चौकात एवढा मोठा जल्लोष करू की हे पुन्हा निवडणूक लढवणार नाहीत, असे मी विश्वासाने सांगतो.