Satara ZP : झेडपीसाठी उदयनराजे अन्‌ शिवेंद्रराजे वापरणार ‘तो’ फॉर्म्युला?; सोनगाव बंगल्यावर खलबतं

Satara, 19 January : सातारा जिल्हा परिषद आणि पंचायत समितीच्या निवडणुकीसाठी सातारा तालुक्यातील गट, गणांच्या जागा वाटपाचा फॉर्म्युला ठरविण्यासाठी खासदार उदयनराजे भोसले आणि सार्वजनिक बांधकाम मंत्री शिवेंद्रसिंहराजे भोसले यांच्यात सोनगाव बंगल्यावर खलबतं रंगली. सुमारे दोन तास झालेल्या या चर्चेत तालुक्यातील गट, गणांची वाटणी कशी करायची, याविषयी चर्चा झाली.

खेड, कोडोली, शेंद्रे, नागठाणे या गटांसाठी उदयनराजेंचा (Udayanraje) गट आग्रही असल्याचे सांगितले जात आहे. जागा वाटपाचे चित्र उद्या (मंगळवारी) निश्चित होणार असल्याचे दोन्ही राजेंच्या गटांकडून सांगण्यात आले आहे.

सातारा (Satara) तालुक्यातील आठ गट व १६ गण असून, त्यातील जागा वाटपांबाबत आज सार्वजनिक बांधकाममंत्री शिवेंद्रसिंहराजे भोसले व खासदार उदयनराजे भोसले यांची सोनगाव बंगला येथे बैठक झाली. या वेळी महायुतीचे समन्वयक सुनील काटकर, माजी जिल्हा परिषद सदस्य राजू भोसले उपस्थित होते.

दोन्ही राजेंमध्ये सातारा तालुक्यातील गट, गणांबाबत दोन तास चर्चा झाली. चर्चेची आजची पहिली फेरी असून, उद्या (मंगळवार) अंतिम जागा वाटपावर शिक्कामोर्तब होण्याची शक्यता आहे. मागील वेळी सातारा तालुक्यात दहा गट होते. यापैकी सात गट व अकरा गणात मंत्री शिवेंद्रसिंहराजे गटाचे सदस्य होते. तीन गट व नऊ गणांत खासदार उदयनराजे गटाचे सदस्य निवडून आले होते. त्यानंतर आता होणाऱ्या जिल्हा परिषदेच्या या निवडणुकीत पालिकेची हद्दवाढ झाल्यामुळे दोन गट व चार गण रद्द झाले आहेत.

आता तालुक्यात आठ गट व १६ गण राहिले आहेत. आता दोन्ही राजे भारतीय जनता पक्षात असून, त्यांचे मनोमिलन असल्याने जागा वाटपही निम्मे निम्मे होणार की मागील वेळचा फॉर्म्युला वापरला जाणार याची उत्सुकता आहे.

सध्या तरी उदयनराजेंच्या गटाकडून खेड, कोडोली, शेंद्रे व नागठाणे या चार गटांसाठी आग्रह दिसत आहे. कोणते गट कोणाला सोडले जाणार, तसेच त्या खालील गणांची वाटणी कशी होणार हे उद्या (मंगळवारी) स्पष्ट होणार आहे. त्यामुळे तालुक्यातील इच्छुकांत अस्वस्थता पसरली आहे.