Solapur NCP SP : नाराज बळीराम साठेंना पवारांचा भेटीचा सांगावा; गोविंद बागेत आज सायंकाळी होणार चर्चा

Solapur, 19 June : राष्ट्रवादी काँग्रेस शरदचंद्र पवार पक्षाच्या जिल्हाध्यक्षपदावरून उचलबांगडी करण्यात आलेले जिल्हा परिषदेचे माजी अध्यक्ष बळीराम काका साठे यांना अखेर गोविंद बागेतून बोलावणं आलं आहे. शरद पवारांना भेटणार नाही; म्हणणारे काका साठेही अखेर त्यांच्या भेटीसाठी बारामतीला जाणार आहेत. आज (ता. 19 जून) सायंकाळी सहाच्या सुमारास ही भेट होण्याची शक्यता आहे. या भेटीतून साठेंची नाराजी दूर होणार का, याकडे सोलापूरच्या राजकीय वर्तुळाचे लक्ष लागले आहे.

दरम्यान, शरद पवारांच्या (Sharad Pawar) भेटीला जाताना बळीराम काका साठे हे नूतन जिल्हाध्यक्षांनी बरखास्त केलेली जिल्हा कार्यकारिणीमधील माजी तालुकाध्यक्ष, वरिष्ठ सदस्यांना घेऊन जाणार असल्याची माहिती आहे, त्यामुळे गोविंद बागेत कोणाच्या विरोधात आवाज उठतो, हे पाहावे लागेल.

बळीराम साठे (Baliram Sathe ) यांना राष्ट्रवादी काँग्रेस शरदचंद्र पवार पक्षाच्या जिल्हाध्यक्षपदावरून दूर करून त्या ठिकाणी मोहिते पाटील समर्थक वसंतराव देशमुख यांची नियुक्ती करण्यात आली आहे. या निवडीनंतर साठे यांनी खासदार धैर्यशील मोहिते पाटील आणि प्रदेशाध्यक्ष जयंत पाटील यांच्यावर तोफ डागली आहे. या दोघांनी षडयंत्र करून मला जिल्हाध्यक्षपदावरून दूर केले, असा आरोपही साठे यांनी केला आहे.

आपल्याला जिल्हाध्यक्षपदावरून अपमानास्पद रितीने दूर करण्यात आले आहे, त्यामुळे आता शरद पवारांनी सांगितले तरीही आपण राष्ट्रवादी काँग्रेस शरदचंद्र पवार पक्षात थांबणार नाही. तसेच, पवार साहेबांना भेटायलाही जाणार नाही, अशी घोषणा दोन दिवसांपूर्वी साठे यांनी केली होती. मात्र, शरद पवार यांचे सोलापूर जिल्ह्यातील अत्यंत विश्वासू संजय पाटील घाटणेकर यांनी पवारांची भेट घेऊन त्यांना साठेंच्या निर्णयाबाबत कळविले होते.

अत्यंत अडचणीच्या काळात साठे यांनी पक्षासाठी योगदान दिल्याचे आपण पवारांपुढे अधोरेखित केले, असे घाटणेकर यांनी सांगितले. त्यावेळी शरद पवार यांनी बळीराम साठे यांना वाऱ्यावर सोडणार नाही, असा शब्द घाटणेकर यांच्याजवळ दिला होता. तसेच, शरद पवारही काका साठे यांच्याशी चर्चा करणार आहेत, असेही घाटणेकर यांनी म्हटले होते.

संजय पाटील घाटणेकर यांच्या यशस्वी मध्यस्थीनंतर गोविंद बागेतून बळीराम साठे यांना भेटीचा सांगावा आला आहे. सुरुवातीला पवार साहेबांना भेटणार नाही म्हणणारे साठे यांनी अखेर शरद पवारांना भेटायला जाण्याचा निर्णय घेतला आहे. ही भेट आज सायंकाळी सहाच्या सुमारास होणार असल्याची माहिती साठेंचे निकटवतीर्यांकडून देण्यात आली.

काका साठे निर्णय बदलणार का?

बळीराम साठे यांनी राष्ट्रवादी काँग्रेसमध्ये थांबणार नसल्याचे म्हटले होते. मात्र, पवारांच्या भेटीनंतर त्यांच्या निर्णयात बदल होतो का, हे पाहावे लागेल. मात्र, या भेटीत साठे हे आपल्या मनातील सर्व खदखद पवारांच्या समोर मांडण्याची शक्यता वर्तवण्यात येत आहे.

माजी तालुकाध्यक्षांचे शिष्टमंडळही सोबत असणार

राष्ट्रवादी काँग्रेस शरदचंद्र पवार पक्षाचे नवनिर्वाचित जिल्हाध्यक्ष वसंतराव देशमुख यांनी जुनी जिल्हा कार्यकारिणी बरखास्त केली आहे, त्यामुळेही अनेक जण दुखावले आहेत, त्या सर्व माजी तालुकाध्यक्षांना घेऊन काका साठे हे आज शरद पवार यांना बारामतीत भेटणार आहेत, त्यामुळे या नाराजांचा रागही नेमका कोणावर निघणार हे, या बैठकीतून स्पष्ट होणार आहे.