Rupesh More: वसंत मोरेंची मोठी घोषणा! मुलाचा फोटो शेअर करत म्हणाले, यंदा माझ्या अंगावर गुलाल पडणारच...

Rupesh More: राज्यात सध्या दिवाळीची धुमधाम सुरु आहे. आज लक्ष्मीपूजनाचा दिवस त्यानंतर आणखी दोन दिवसांनंतर दिवाळसणाची सांगता होईल. त्यानंतर निवडणूक आयोगाकडून राज्यातील महापालिका निवडणुकांची कोणत्याही क्षणी घोषणा होण्याची शक्यता आहे. ही स्थानिक पातळीवरील निवडणूक कार्यकर्त्यांची निवडणूक म्हणून ओळखली जाते. आजवर तीन टर्म पुणे महापलिकेत मनसेचा धडाकेबाज नगरसेवक म्हणून ख्याती मिळवलेले वसंत मोरे आता ठाकरेंच्या शिवसेनेत आहेत. त्यामुळं यंदाची माहापालिका निवडणूक त्यांच्यासाठी कशी असेल असा प्रश्न सर्वांना पडलेला असतानाच त्यांनी एक सूचक खुलासा केला आहे. यंदाच्या पुणे महापालिका निवडणुकीसाठी वसंत मोरेंचे चिरंजीव रुपेश मोरे याला मैदानात उतवण्याची रणनीती त्यांनी आखली आहे.

वसंत मोरेंचे चिरंजीव रुपेश याचा काल २० ऑक्टोबर रोजी वाढदिवस पार पडला. मुलाच्या वाढदिवसानिमित्त वसंत मोरेंनी एक फेसबूक पोस्ट केली. या पोस्टमध्ये त्यांनी आपल्या मुलाबाबत महत्वाची माहिती दिली. पोस्टमध्ये वसंत मोरे म्हणतात, "मी जेव्हा २००७ साली पहिल्यांदा नगरसेवक झालो तेव्हा तू पहिलीला शाळेत होता तेव्हापासून सतत १५ वर्ष तुझ्या अंगावर माझ्या प्रत्येक महानगरपालिकेच्या निवडणुकीत विजयाचा गुलाल पडला आहे. पण यावेळी तुझ्या निवडणुकीत माझ्या अंगावर गुलाल पडणारच ही कात्रजच्या ग्रामदैवत श्री. काळभैरवनाथांचीच ईच्छा आहे. रुपेश वसंत मोरे तुला वाढदिवसाच्या लाख लाख शुभेच्छा..." त्याचबरोबर वसंत मोरे पहिल्यांदा नगरसेवक झाल्यानंतर गुलाल उधळला तेव्हाचा जुना फोटो त्यांनी पोस्टसोबत शेअर केला आहे. या फोटोत रुपेश अगदीच लहान शाळकरी मुलगा दिसतो आहे. तर दुसऱ्या एका फोटोत रुपेश कॉलेजचा तरुण दिसतो असून त्याच्या गळ्यात शिवसेनेचा पंचा त्यावर मशालीचं पक्ष चिन्ह दिसतं आहे.

दरम्यान, वसंत मोरेंनी केलेली ही स्पष्टपणे माहिती देणारी पोस्ट आहे. यंदाच्या पुणे महापालिकेच्या निवडणुकीत रुपेश वसंत मोरे याला शिवसेनेकडून उमेदवारी निश्चित असल्याचं मानलं जात आहे. तसंच या निवडणुकीत रुपेशचा नक्कीच विजय होईल, असा विश्वासही वसंत मोरेंनी व्यक्त केला आहे.

पण जर वसंत मोरेंचा चिरंजीव नगरसेवकपदाची निवडणूक लढणार असेल तर वसंत मोरेंवर पक्षाकडून आणखी मोठी जबाबदारी टाकली जाऊ शकते. त्यामुळं मोरे आता शहराच्या नव्हे तर राज्याच्या राजकारणात सक्रीय होतील, अशीही चर्चा सुरु झाली आहे.