Sharad Pawar : मराठा-ओबीसी वादावर शरद पवार तोडगा काढणार? अधिवेशन संपताच 'त्या' लोकांशी संवाद साधणार

Sharad Pawar News : मागील अनेक दिवसांपासून राज्यात मराठा आणि ओबीसी आरक्षणाच्या मुद्द्यावरुन तणाव निर्माण झाला आहे. आपापल्या समाजाच्या विविध मागण्यांसाठी आंदोलन करणाऱ्या आंदोलकांनी सत्ताधाऱ्यांसह विरोधी पक्षातील काही महत्वाच्या नेत्यांना आपली आमच्या समाजाविषयी काय भूमिका आहे ती स्पष्ट करा अशी मागणी केली आहेत.

यात प्रामुख्याने अनेकांकडून राष्ट्रवादी काँग्रेस शरद पवार (Sharad Pawar) पक्षाचे सर्वेसर्वा शरद पवार यांनी आरक्षणाविषयीची भूमिका स्पष्ट करावी अशी मागणी केली जात आहे. याच आरक्षणाच्या प्रश्नावर आता शरद पवारांनी एका कार्यक्रमात बोलताना मोठं विधान केलं आहे. (Maratha and OBC reservation)

ज्या जिल्ह्यांत आरक्षणाच्या मुद्द्यावरुन दोन समाजात तेढ निर्माण झाला आहे, जिथे अस्वस्थता आहे, अशा ठिकाणी जाऊन लोकांशी संवाद साधणार असल्याचं पवार (Sharad Pawar) यांनी सांगितलं आहे. आरक्षणावरील प्रश्नावर भूमिका स्पष्ट करताना शरद पवार म्हणाले, "महाराष्ट्रातील जालना, बीड यासारख्या जिल्ह्यांमध्ये अस्वस्थता आहे. संसदेचं पावसाळी अधिवेशन संपल्यानंतर या ठिकाणी जाऊन तिथल्या लोकांशी संवाद साधणार आहे.

कटुता, अविश्वासाचं चित्र दिसतंय ते भयावह आहे. एका समाजाचं हॉटेल असेल तर दुसऱ्या समाजाचे लोक तिथं चहा घ्यायलाही जात नाहीत, असं मी महाराष्ट्रात कधीही ऐकलेलं नाही. काहीही करून हे चित्र बदललं पाहिजे. लोकांमध्ये विश्वास, संवाद वाढला पाहिजे. आमच्यासारख्या लोकांनी यासाठी जीव ओतून काम करायला पाहिजे, असं पवार म्हणाले.

तसंच, सार्वजनिक जिवनात जेव्हा संवाद थांबतो तेव्हा चुकीच्या समजुती वाढतात. त्यामुळे संवाद गरजेचा आहे. या प्रक्रियेत आमच्यासारख्या लोकांनी अधिक लक्ष द्यायला पाहिजे. मात्र, दुर्दैवाने दोन वेगवेगळे गट पडले आहेत.

आजच्या राज्यकर्त्यांनी दोन बाजू घेतल्या आहेत. एका गटाने ओबीसींची तर एका गटाने मराठा (Maratha) आंदोलकांची बाजू घेतली आहे. हे योग्य नाही. आपण सामंजस्य कसं निर्माण कसं करू यावर अधिक लक्ष देणं गरजेचं आहे. मी सांगितल्याप्रमाणे संवाद वाढवणं गरजेचं आहे, अशा शब्दात त्यांनी आरक्षणाबाबतची भूमिका स्पष्ट केली आहे.