Shivsena News : खातेवाटपावरून शिंदे गटाच्या बड्या नेत्याचे सूचक वक्तव्य; म्हणाले, 'मंत्रिपदाचे वाटप करताना...'

Mumbai News : राज्यातील महायुती सरकारचा शपथविधी सोहळा गुरुवारी आझाद मैदानावर उत्साही वातावरणात पार पडला. देवेंद्र फडणवीसांनी मुख्यमंत्रिपदाची, तर एकनाथ शिंदे, अजित पवारांनी उपमुख्यमंत्रिपदाची शपथ घेतली. यानंतर आता खातेवाटपात कोणाला काय मिळणार ? याची उत्कंठा शिगेला पोहचली आहे. मंत्रिमंडळ विस्ताराकडे अनेकांचे लक्ष लागले आहे. यातच भाजप आणि शिवसेना शिंदे गट आणि राष्ट्रवादी काँग्रेस अजित पवार पक्षात मंत्रि‍पदावरून रस्सीखेच सुरु असल्याची चर्चा आहे. (Mahayuti News )

राज्यात सरकार स्थापन झाले असले तरी मंत्रिमंडळ विस्तार अद्याप बाकी आहे. त्यामुळे आता महायुतीच्या (Mahayuti) सरकारचा विस्तार कधी होणार याकडे सर्वांचे लक्ष लागून राहिले असताना शिंदे गटाच्या बड्या नेत्याचे मोठे विधान केले आहे. येत्या काळात मंत्रिपदाचे वाटप करताना सर्वच पक्षांना तारेवरची कसरत करावी लागणार असल्याचे स्पष्ट केले.

सध्या मंत्रिमंडळ विस्ताराबाबत महायुतीच्या नेत्यांमध्ये चर्चा सुरु असतानाच आता शिवसेना (Shivsena) शिंदे गटाचे प्रवक्ते संजय शिरसाट यांनी महायुती सरकारच्या मंत्रिमंडळ विस्ताराबाबत मोठे विधान केले आहे. येत्या काळात मंत्रिपदे देताना कसरत करावी लागणार असल्याचं विधान त्यांनी केले आहे.

विधानसभा निवडणुकीत महायुतीचे 232 आमदार निवडून आले आहेत, तर एकूण मंत्रि‍पदे 43 आहेत. त्यामुळे 43 आमदार मंत्रिपदाची शपथ घेऊ शकतात. त्यामुळे निश्चितच यामध्ये थोडी कसरत करावी लागणार आहे. त्यामध्ये अनेक सीनियर आमदार आहेत, अनेकांचा अनुभव आहे. या सर्वांचा ताळमेळ बसवण्यासाठी नेत्यांना कौशल्य दाखवावे लागणार आहे, असेही यावेळी संजय शिरसाट यांनी स्पष्ट केले आहे.

भाजप आणि शिंदेंच्या शिवसेनेमध्ये गृहखात्यावरून रस्सीखेच सुरु असल्याची चर्चा आहे. एकनाथ शिंदे हे गृहखात्यासाठी आग्रही आहेत, तर भाजप गृहखाते सोडण्यास तयार नसल्याची चर्चा आहे. या पार्श्वभूमीवर शिवसेना आमदार संजय शिरसाट यांना प्रश्न विचारला असता यासंदर्भातील निर्णय अद्याप झाला नसल्याचे सांगत गृहखाते कोणाकडे असेल? यावर आमचे वरिष्ठ निर्णय घेणार असल्याची माहिती त्यांनी दिली.