Devendra Fadnavis : 'एकतर तू तरी राहशील, नाहीतर मी...'; ठाकरेंच्या 'त्या' टीकेवर शपथविधीनंतर CM फडणवीसांची प्रतिक्रिया, म्हणाले, "मी त्याचवेळी..."

Mumbai News, 06 Dec : विधानसभा निवडणुकीपूर्वी शिवसेना पदाधिकाऱ्यांसोबत संवाद साधताना शिवसेना (उद्धव ठाकरे) पक्षाचे प्रमुख उद्धव ठाकरे (Uddhav Thackeray) यांनी पदाधिकाऱ्यांशी संवाद साधताना तत्कालीन उपमुख्यमंत्री देवेंद्र फडणवीसांना 'एकतर तू तरी राहशील, नाहीतर मी तरी राहीन.' असा इशारा दिला होता.

ठाकरेंच्या या निवडणुकीपूर्वीच्या वक्तव्यावर देवेंद्र फडणवीस (CM Devendra Fadnavis) यांनी मुख्यमंत्रि‍पदाची शपथ घेतल्यानंतर प्रतिक्रिया दिली आहे. शपथविधीनंतर आयोजित पत्रकार परिषदेत बोलताना त्यांनी राज्यातील राजकीय संस्कृतीवर पुनर्विचार करण्याची गरज असल्याचं वक्तव्य केलं.

2024 नंतरच्या महाराष्ट्राकडे तुम्ही कसं पाहता? असा प्रश्न विचारला असता फडणवीस म्हणाले, "मला असं वाटतं की, महाराष्ट्र वेगाने प्रगती करत आहे. मात्र राज्यातील राजकीय संस्कृतीवर पुनर्विचार करण्याची गरज सर्व पक्षांना आहे. राजकीय वातावरण योग्य कसं करता येईल याचा प्रयत्न आपण केला पाहिजे", असं ते यावेळी म्हणाले.

यावेळी त्यांनी शपथविधीसाठी राज्यातील सर्व नेत्यांना फोन केल्याचंही सांगितलं. ते म्हणाले, "मी शपथविधीच्या निमित्ताने माननीय शरद पवारसाहेब, उद्धव ठाकरे (Uddhav Thackeray) सुशीलकुमार शिंदे, पृथ्वीराज चव्हाण आणि राज ठाकरे अशा सर्व प्रमुख नेत्यांना स्वतः फोन करून निमंत्रण दिलं. या सर्व नेत्यांनी माझं अभिनंदन करत शुभेच्छा दिल्या."

तसंच महाराष्ट्रातील राजकीय संवाद कधीच संपला नाही. इतर राज्यांमध्ये दोन पक्षांमध्ये किंवा नेत्यांमध्ये मोठ्या प्रमाणात विसंवाद असतो. मात्र तशी परिस्थिती महाराष्ट्रात कधीही नव्हती आणि ती पुढे राहू नये हा माझा प्रयत्न असेल, असं ते म्हणाले.

आम्ही सगळेच राहणार

दरम्यान, यावेळी पत्रकारांनी 'एक तर तुम्ही राहाल नाही तर मी', असं म्हणणाऱ्यांना काय उत्तर द्याल? असं विचारलं असता फडणवीस म्हणाले, "मी त्याचवेळी सांगितलं होतं की, राजकारणात सगळेच राहतात, तेही (उद्धव ठाकरे) राहतील आणि मीही राहील. आम्ही सगळेच राहणार आहोत."