Thackeray Vs Shinde: शिवसेना पक्ष अन् धनुष्यबाण चिन्हाबाबत मोठी अपडेट; सर्वोच्च न्यायालय कुणाला धक्का देणार ठाकरे की शिंदे?

Mumbai News : एकीकडे आगामी स्थानिक स्वराज्य संस्थांच्या निवडणुकांमुळे राजकीय वातावरण चांगलंच तापलं आहे.सर्वच राजकीय पक्षांनी या निवडणुकांसाठी जोरदार तयारी सुरू केली आहे. याचदरम्यान, आता माजी मुख्यमंत्री उद्धव ठाकरे आणि उपमुख्यमंत्री एकनाथ शिंदे यांच्यासाठी उद्याचा (ता.8) दिवस अत्यंत महत्त्वाचा असणार आहे. शिवसेना (Shivsena) पक्षाचं नाव आणि चिन्हावर निकाल जाहीर होण्याची शक्यता आहे. सुप्रीम कोर्टात या प्रकरणी अंतिम सुनावणी होणार असल्याची माहिती आहे.

सर्वोच्च न्यायालयात शिवसेना उद्धव बाळासाहेब ठाकरे पक्षाची बाजू मांडणारे वकील असीम सरोदे यांनी ट्विटद्वारे प्रतिक्रिया दिली आहे. शिवसेना धनुष्यबाण चिन्हाबाबत उद्या अंतिम सुनावणी घेणार असे सर्वोच्च न्यायालयानं जाहीर केले आहे. दिनांक 8 ऑक्टोम्बर ला जस्टीस सूर्यकांत नक्की सुनावणी घेतील अशी अपेक्षा असल्याचं त्यांनी सरोदे यांनी म्हटलं आहे.

इकडे मोदी बांधून तयार नसलेल्या विमानतळाचे नवी मुंबईत दिखाऊ उदघाटन करणार आणि त्याचवेळी संविधानासोबत अनैतिकता करून सत्तेच्या हवेत असलेल्या एकनाथ शिंदे यांचे विमान सर्वोच्च न्यायालय (Supreme Court) जमिनीवर पाडणार का? लवकरच कळेल,असं वकील असीम सरोदे यांनी ट्विटमध्ये नमूद केलं आहे.

एकनाथ शिंदे यांनी 2022 मध्ये शिवसेनेत 40 आमदारांसह केलेल्या सर्वात मोठ्या बंडानंतर राज्यातलं महाविकास आघाडी सरकार कोसळलं. एवढंच नव्हे तर,शिवसेना पक्षाचं नाव आणि चिन्हही विधानसभा अध्यक्षांसह निवडणूक आयोगानं एकनाथ शिंदेंच्या पक्षाला बहाल केलं.उद्धव ठाकरेंना शिवसेना उद्धव बाळासाहेब ठाकरे हे नाव आणि मशाल हे चिन्ह दिलं.या नावावर आणि मशाल चिन्हावरच ठाकरेंनी लोकसभा आणि विधानसभा निवडणुका लढवल्या.

आता स्थानिक स्वराज्य संस्थांच्या निवडणुकांच्या तोंडावरच शिवसेना पक्ष नाव आणि धनुष्यबाण चिन्हाबाबत महत्त्वाची अपडेट समोर येत आहे. सुप्रीम कोर्टात या प्रकरणात गेल्या अनेक महिन्यांपासून सुनावणी सुरु आहे. या प्रकरणाची सुनावणी आता अंतिम टप्प्यावर आली आहे.

सर्वोच्च न्यायालयात याप्रकरणी बुधवारी (ता.8) अंतिम सुनावणी होणार असल्याची माहिती आहे. त्यामुळे आगामी स्थानिक स्वराज्य संस्थांच्या निवडणुकांपूर्वी शिवसेना पक्षाचं नाव आणि चिन्हावर निकाल जाहीर होण्याची शक्यता आहे. सर्वोच्च न्यायालयाचा निकाल शिवसेना उद्धव बाळासाहेब ठाकरे पक्षासाठी शेवटचा आशेचा किरण आहे.

मुंबई महापालिका निवडणुकांच्या आधी शिवसेना पक्ष नाव आणि धनुष्यबाण चिन्हाबाबतचा निकाल जर पुन्हा उद्धव ठाकरे यांच्या बाजूने लागला, तर महाराष्ट्राचं राजकारण ढवळून निघणार आहे. राज्याच्या राजकारणावर त्याचे मोठे पडसाद उमटण्याची शक्यता आहे. त्यामुळे या सुनावणी आणि निकालाकडे राज्यासह संपूर्ण देशाचं लक्ष लागलं आहे.