Shivendraraje Bhosale statement : मराठा आणि ओबीसी आरक्षणाबाबत मंत्री शिवेंद्रराजे भोसलेंचे मोठे विधान; म्हणाले, 'सीएम फडणवीसांनी कधीही...'

Mumbai News : राज्यभरातील मराठा समाजाने मुंबईमधील आझाद मैदानावर एकत्र येत मनोज जरांगे पाटील यांच्या नेतृत्वाखाली आंदोलन केले. या आंदोलनाला मोठे यश मिळाले असून यावेळी मराठा समाजाच्या वतीने करण्यात आलेल्या आठ पैकी सहा मागण्या मान्य झाल्या आहेत. हैदराबाद गॅझेट लागू करण्यात आल्याने मराठा समाजातून जल्लोष करण्यात येत आहे. तर दुसरीकडे मराठा आरक्षणाबाबत सरकारने घेतलेल्या या भूमिकेला ओबीसी समाजातून विरोध होत आहे. त्यातच आता मराठा समाज उपसमितीमध्ये असलेल्या मंत्री शिवेंद्रराजे भोसले यांनी मोठे विधान केले आहे.

मनोज जरांगे पाटील (Manoj Jarange patil) यांनी केलेल्या आंदोलनाला मोठे यश मिळाले आहे. मराठा समाजाला आरक्षण मिळावे यासाठी गेल्या दोन वर्षांपासून ते प्रयत्न करीत होते. मराठा समाजाला आरक्षण दिल्याने दुसरीकडे मात्र ओबीसी समाज चांगलाच आक्रमक झाला आहे. मराठा समाजाला ओबीसीमधून आरक्षण नको तर स्वतंत्र्य आरक्षण द्या, अशी ओबीसी समाजाची मागणी आहे.

या सर्व पार्श्वभूमीवर बोलताना मंत्री शिवेंद्रराजे भोसले यांनी मोठे विधान केले आहे. ते म्हणाले, 'देवेंद्र फडणवीस (devendra fadnavis) हे मराठा समाजाचे देखील नेते आहेत, मी मराठा समाज उपसमितीमध्ये होतो अनेक बैठका झाल्या, मात्र देवेंद्र फडणवीस यांनी कधीही सांगितले नाही की, ओबीसीचं आरक्षण काढून मराठा समाजाला द्या, देशात नरेंद्र आणि राज्यात देवेंद्र यामुळे वंचित घटकाला न्याय मिळत असल्याचे त्यांनी स्पष्ट केले.

प्रत्येक गोष्टीची जाण असणारा नेता म्हणजे देवेंद्र फडणवीस आहेत. आजपर्यंत ओबीसी आणि मराठा समाजाला वापरण्याचे काम काँग्रेसने केले तर या दोन्ही समाजाला न्याय देण्याचे काम भाजपने केले असे यावेळी शिवेंद्रराजे भोसले यांनी स्पष्ट केले आहे.

दरम्यान, भाजपकडून राज्यभरात देवाभाऊ कॅम्पेन राबविण्यात येत आहे. राज्यातील सर्व प्रमुख वर्तमानपत्रात जाहिरात देऊन आणि मुंबईत काही ठिकाणी बॅनर लावून देवाभाऊ कॅम्पेन राबविण्यात आले. त्यामुळे या कॅम्पेनवरून आता सर्वत्र चर्चा रंगली आहे. विशेष म्हणजे महायुतीमधील मित्रपक्षात मात्र मराठा आरक्षणाचे श्रेय घेण्यावरून चढाओढ सुरु आहे.