SIT : सोमनाथ सूर्यवंशी हत्या प्रकरणात मोठी अपडेट, प्रकाश आंबेडकरांची 'ती' मागणी मान्य, पोलिसांची अडचण वाढली

Somnath Suryawanshi Custody Death : परभणीतील पोलिस कोठडीत सोमनाथ सूर्यवंशी मृत्यू प्रकरणात ॲड. प्रकाश आंबेडकर यांनी पोलीस कोठडीतील मृत्यू प्रकरणी एसआयटी चौकशीची मागणी केली होती, त्यानुसार न्यायालयाने एसआयटी स्थापन करण्याचे आदेश गेल्या आठवड्यात दिले होते. त्या प्रमाणे पोलिस महासंचालक रश्मी शुक्ला यांनी एसआयटीची स्थापना केली आहे.

एसआयटीमध्ये तीन पोलिस अधिकाऱ्यांची नियुक्ती करण्यात आली असून सीबीआयमधून नुकतेच महाराष्ट्रात रुजू झालेले विशेष सीआयडीचे पोलिस महानिरीक्षक सुधीर हिरेमठ हे या एसआयटीचे अध्यक्ष असणार आहेत. तर, नागपूर सीआयडीचे पोलिस अधिक्षक अभिजीत धाराशिवकर आणि नांदेडमधील सीआयडीचे पोलिस उपअधिक्षक अनिल गवाणकर हे सदस्य असणार आहेत.

या तपास पथकात परभणी जिल्ह्यातील कोणत्याही अधिकारी वा कर्मचाऱ्यांचा समावेश करण्यात येणार नाही, असे स्पष्ट निर्देश देण्यात आले आहेत. एसआयटीचे अध्यक्ष हे प्रत्यक्ष अपर पोलीस महासंचालक, राज्य गुन्हे अन्वेषण विभाग, पुणे यांच्या मार्गदर्शनाखाली तपासाचे काम पाहणार आहेत.

सोमनाथ सूर्यवंशी यांच्या पोलिस कोठडीतील मृत्यू प्रकरणी त्यांची आई विजयाबाई सूर्यवंशी यांनी मुंबई उच्च न्यायालयाच्या औरंगाबाद खंडपीठात रिट याचिका दाखल केली होती. या प्रकरणी संबंधित पोलिसांवर गुन्हे दाखल करण्याचे आदेश औरंगाबाद खंडपीठाने दिले होते, त्याविरोधात पोलिसांनी सर्वोच्च न्यायालयात धाव घेतली होती मात्र, सर्वोच्च न्यायालयात पीडितांच्या बाजूने ॲड. प्रकाश आंबेडकर यांनी न्यायालयात युक्तिवाद केला होता. त्यानंतर सर्वोच्च न्यायालयाने उच्च न्यायालयाचा आदेश कायम करत गुन्हे दाखल करण्याचे आदेश दिले होते.