Sunil Tatkare Video : नाराज छगन भुजबळ यांच्यासाठी अजितदादांकडे 'प्लॅन बी', सुनील तटकरेंनी सगळच सांगून टाकलं

Sunil Tatkare News : मंत्रिमंडळात स्थान न झाल्याने छगन भुजबळ नाराज आहेत. नागपूरच्या अधिवेशनातून त्यांनी थेट नाशिक गाठले. समता परिषदेच्या कार्यक्रमात त्यांनी अजित पवार यांचे नाव न घेता जोरदार टीका केली. त्यामुळे भुजबळ राष्ट्रवादी सोडणार अशा चर्चा सुरू झाल्या आहेत. मात्र, भुजबळांची नाराजी दूर करण्यासाठी राष्ट्रवादी काँग्रेसकडे प्लॅन बी असल्याची कबुली राष्ट्रवादीचे प्रदेशाध्यक्ष सुनील तटकरे यांनी दिली आहे.

'साम टिव्ही'ला दिलेल्या मुलाखतीमध्ये सुनील तटकरे म्हणाले, 'छगन भुजबळ यांच्या संदर्भात समीर भुजबळ, पंकज भुजबळ यांच्याशी चर्चा केल्या आहेत. प्रफुल पटेल यांनी त्यांच्याकडे प्रस्ताव दिला आहे. योग्य पद्धतीने यावर पडदा टाकण्यात येईल. छगन भुजबळ हे ज्येष्ठ आहेत. त्यांच्या ज्येष्ठत्वाचा फायदा दिल्लीत होईल. आम्ही एकत्रित बसून या संदर्भात चर्चा करू.'

भुजबळासाहेबांनी अनेक वर्षातून संघर्ष करून ओबीसीची चळवळ निर्माण केली. त्यामुळे त्यांना मंत्रिपद नाकारल्याने दुख, भावना तीव्र असू शकतात. मात्र, आंदोलन करताना कार्यकर्त्यांकडून चुकीची पद्धत अवलंबली असेल तर त्यांच्यावर कारवाई केली जाईल, असा इशारा देखील तटकरे यांनी दिला.

मंत्रिपद का नाकारले?

छगन भुजबळ यांनी आरक्षणाच्या संदर्भात आक्रमक भूमिका घेतली होती. त्यामुळे मराठा आंदोलकांकडून त्यांना तीव्र विरोध होता. तसेच नाशिकच्या आमदारांनी देखील भुजबळ यांच्या नावाला मंत्रि‍पदासाठी विरोध केला होता त्यामुळे त्यांना मंत्रिपद मिळाले नसल्याच्या चर्चा होत्या. त्यावर तटकरे यांनी प्रतिक्रिया दिली आहे. या चर्चांमध्ये काहीही तथ्य नाही, असे ते म्हणाले.

छगन भुजबळ राज्यसभेवर जाणार?

सुनील तटकरे यांनी संकेत दिले की राज्यसभेवर छगन भुजबळ यांना पाठवण्याचा प्रस्ताव त्यांना देण्यात आला आहे. मात्र, या संदर्भात अजून त्यांच्याशी चर्चा झाली नाही. आम्ही एकत्र बसून यावर चर्चा करू. त्यामुळे आमदारकीचा राजीनाम देऊन छगन भुजबळ हे राज्यसभेवर जाण्यास तयार होणार का? याची उत्सुकता असणार आहे.