Tejasvee Ghosalkar: वेदनेतून घेतला निर्णय! ठाकरेंच्या निष्ठावंत माजी आमदाराच्या सुनेचा भाजपप्रवेश; फेसबूक पोस्ट शेअर

Tejasvee Ghosalkar To Join BJP : शिवसेना उद्धव बाळासाहेब ठाकरे यांचे निकटवर्तीय माजी आमदार विनोद घोसाळकर यांच्या सूनबाई, ठाकरेंचे पक्षाचे दिवंगत माजी नगरसेवक याच्या पत्नी तेजस्वी घोसाळकर या आज भाजपमध्ये प्रवेश करीत आहेत. मुंबई महापालिका निवडणुकीच्या पार्श्वभूमीवर हा पक्ष प्रवेश महत्वाचा मानला जात आहे.

तेजस्वी घोसाळकर या गेल्या काही दिवसांपासून ठाकरे सेनेत नाराज असल्याची चर्चा होती. अशातच मुंबै बँकेवर त्यांची संचालक म्हणून वर्णी लागली होती. मुंबै बँकवर भाजपची सत्ता आहे. भाजपचे मुंबई अध्यक्ष अमित साटम यांच्या उपस्थितीत तेजस्वी घोसाळकर या पक्षप्रवेश करणार आहेत. दादरच्या वसंत स्मृतीमध्ये दुपारी हा पक्षप्रवेश होणार असल्याची माहिती आहे. त्यांनी फेसबूक पोस्ट शेअर करीत शिवसैनिकांना आपण का राजीनामा घेत आहे. याचे कारण सांगितले आहे.

तेजस्वी घोसाळकर यांची मुंबै बँकेच्या संचालकपदी नियुक्ती झाल्यानंतर त्या भाजपच्या वाटेवर असल्याच्या चर्चांना पेव फुटलं होते. त्यानंतर विनोद घोसाळकर यांनी उद्धव ठाकरे यांची भेटही घेतली होती. भाजपमध्ये जाण्याच्या कोणताही निर्णय झाला नसल्याचे स्पष्टीकरण त्यांनी दिले होते.

राज्यात स्थानिक स्वराज्य संस्थांच्या निवडणुकीचे बिगुल वाजले तेव्हा गेल्या महिन्यात तेजस्वी या एकनाथ शिंदे यांच्या शिवसेनेत जाणार असल्याची चर्चा होत्या.तेव्हा त्या एकनाथ शिंदे यांच्या शिवसेनेच्या संपर्कात असल्याचीही चर्चा होती. शिंदे सेनेकडून त्या मुंबई महापालिकेची निवडणूक लढण्याची शक्यता व्यक्त केली जात होती.

तेजस्वीनी घोसाळकर यांचा प्रभाग क्रमांक एक हा ओबीसी महिलेसाठी राखीव झाला आहे. घोसाळकर कुटुंबाचे प्राबल्य असलेल्या या त्यांच्या हक्काच्या वार्डात निवडणूक लढविता येणार नाही. त्यामुळे त्यांनी मुंबई महापालिका निवडणुकीच्या तोंडावरच घोसाळकर यांनी साथ सोडल्यास उद्धव ठाकरे यांच्या शिवसेनेला त्याचा फटका बसणार आहे.

कोण आहेत तेजस्वी घोसाळकर?

तेजस्वी या माजी आमदार आणि शिवसेना उद्धव बाळासाहेब ठाकरे पक्षाचे ज्येष्ठ नेते विनोद घोसाळकर यांच्या सून आहेत. दिवंगत माजी नगरसेवक अभिषेक घोसाळकर यांच्या पत्नी आहेत.पती अभिषेक घोसाळकर यांची गेल्या वर्षी गोळी झाडून हत्या करण्यात आली होती.लग्नाच्या वाढदिवसाच्या चार दिवस आधीच मॉरिस नामक व्यक्तीने अभिषेक घोसाळकर यांच्यावर फेसबुक लाईव्ह करून गोळ्या झाडल्या होत्या. मात्र त्यातून त्या सावरल्या. गेल्या विधानसभेच्या निवडणुकीत त्यांनी लढण्याची इच्छा व्यक्त केली होती; मात्र त्यांना तिकीट नाकारण्यात आल्याने त्यांच्या मतदारसंघात नाराजीची चर्चा होती.