Tukaram Mundhe News : तुकाराम मुंढेंना डावललं? नियुक्तीच्या प्रतीक्षेत! सिंघल यांची बदली रद्द; निर्णयामागे राजकीय गणित...

Tukaram Mundhe News : दहा दिवसांपूर्वी IAS अधिकाऱ्यांच्या बदल्या करण्यात आल्या होत्या. या बदल्यांमध्ये दिव्यांग कल्याण विभागाचे सचिव तुकाराम मुंढे यांची बदली आपत्ती व्यवस्थापन, मदत व पुनर्वसन विभागाच्या सचिवपदी करण्यात आली होती. मात्र, त्यांच्या आईचे निधन झाल्याने त्यांना या पदावर लगेच रुजू होता आले नाही. या पदावरील सचिव विनिता वैद सिंघल यांची बदली मृद व जलसंधारण विभागात करण्यात आली होती.

दरम्यान, विनिता वैद सिंघल यांची बदली रद्द करत त्यांना आपत्ती व्यवस्थापन, मदत व पुनर्वसन विभागाच्या सचिवपदी कायम ठेवण्यात आले आहे. सिंघल यांची पाच महिन्यांपूर्वीच आपत्ती व्यवस्थापनात बदली करण्यात आली होती. त्यामुळे पुन्हा त्यांची बदली केल्याने वेगवेगळ्या चर्चा सुरू होत्या. दरम्यान, सिंघल यांना पुन्हा त्याच विभागात कायम ठेवल्याने तुकाराम मुंढे आता नव्या नियुक्तीच्या प्रतीक्षेत आहेत.

बदलीच्या प्रकियेदरम्यान तुकाराम मुंढे यांच्या आईचे निधन झाले होते. त्यामुळे त्यांना रजेवर जावे लागले आणि नवीप पदाचा कार्यभार घेता आला नाही. त्याच दरम्यान, वरिष्ठ मंत्री पातळीवर वेगवान घडामोडी घडल्या आणि सिंघल यांची बदली रद्द करण्याचा निर्णय घेण्यात आला. आणि त्यांच्याकडे जुनाच कार्यभार कायम ठेवण्यात आला.

निर्णयामागे राजकीय गणित?

तुकाराम मुंढे दिव्यांग विभागात असाताना त्यांनी धडाकेबाज निर्णय घेतले होते. त्यांची बदली झाली मात्र नियुक्तीची त्यांना आता प्रत्यक्षा करावी लागणार आहे. त्यामुळे मुंढे यांच्या बदलीच्या आदेशाचे काय झाले आणि त्यांना आता कोणत्या विभागाची जबाबदारी दिली जाणार, याबाबत अद्याप अधिकृत स्पष्टता मिळालेली नाही. आता मुंढे यांना डावलून पुन्हा सिंगल यांचीच नियुक्ती कायम झाल्याने, यामागे कोणते 'प्रशासकीय' की 'राजकीय' गणित आहे, याची चर्चा आहे.