Thackeray ShivSainik network: ठाकरेंनी जुन्या शिवसैनिकांचे नेटवर्क पुन्हा केले अ‍ॅक्टिव्ह; निवडणुकीच्या तोंडावर दिली मोठी जबाबदारी

Mumbai News : आगामी काळात होत असलेल्या मुंबई महापालिकेच्या निवडणुकीची तयारी सर्वच पक्षाकडून युद्धपातळीवर केली जात आहे. त्यासाठी उद्धव ठाकरे यांच्या शिवसेनेनेकडून गेल्या वर्षभरापासून रणनीती आखली जात आहे. नगरपालिकेची निवडणूक प्रक्रिया पूर्ण झाल्यानंतर येत्या काळात मुंबई महापालिकेच्या निवडणुकीची घोषणा करण्यात येणार आहे. त्यामुळे राज्यातील वातावरण ढवळून निघाले आहे.

येत्या काळात होत असलेल्या बीएमसी निवडणुकीच्या रिंगणात ठाकरेंच्या शिवसेनेच्या (Shivsena) ज्येष्ठ शिवसैनिकांची टीम मैदानात उत्तरली आहे. या निवडणुकीच्या तयारीसाठी मदत करण्यासाठी ठाकरेंनी जुन्या शिवसैनिकांचं नेटवर्क पुन्हा अ‍ॅक्टिव्ह केले आहे. त्यानुसार जवळपास मुंबईतील 800 पेक्षा अधिक ज्येष्ठ शिवसैनिक नव्या टीमला मार्गदर्शन करीत आहेत. त्यामुळे वातावरण ढवळून निघणार आहे.

मुंबई महापालिका निवडणुकीसाठी उद्धव ठाकरे (Uddhav Thackeray) यांनी ज्येष्ठ शिवसैनिकांवर मोठी जबाबदारी दिली आहे. त्यानुसार आता ज्येष्ठ शिवसैनिकांची टीम कामाला लागली आहे. त्यामध्ये मुंबई महापालिकेचे माजी नगरसेवक, विभागप्रमुख, उपविभागप्रमुख, शाखा प्रमुख म्हणून काम केलेली मंडळी त्यासोबतच त्याकाळी शिवसेनाप्रमुख उद्धव ठाकरे यांच्यासोबीत काम केलेल्या ज्येष्ठ शिवसैनिकांवर युवा पिढीला मार्गदर्शन करीत मरगळ दूर करण्याची जबाबदारी दिली आहे.

शिवसेनेत उभी फूट पडल्यापासून पक्षाचे झालेले नुकसान भरून काढण्यासाठी आणि आगामी निवडणुकांसाठी संघटनात्मक बांधणी अधिक बळकट करण्यासाठी, जुन्या कार्यकर्त्यांना पुन्हा सक्रिय करणे ही ठाकरे गटाची महत्त्वाची रणनीती आहे. त्याचा फायदा येत्या काळात होत असलेल्या महापालिका निवडणुकीत होणार आहे.

यासाठी ज्येष्ठ शिवसैनिकाशी संपर्क साधला जात आहे. त्यामुळे या ज्येष्ठ शिवसैनिकांच्या मार्गदर्शनाचा फायदा युवा पिढीला होणार आहे. आगामी काळात होत असलेल्या महापालिका निवडणुकीची जोरदार तयारी केली जात आहे. या युवक वर्गाकडून केल्या जात असलेल्या तयारीला मोठ्या प्रमाणात पाठिंबा मिळत असताना आता ज्येष्ठ शिवसैनिकांची टीम त्यांच्या तयारीला उतरली आहे. त्यामुळे शिवसैनिकात चैतन्य पसरले आहे.