Uddhav Thackeray Vs Eknath Shinde : उद्धव ठाकरेंची शिंदेंना मुख्यमंत्री पदाची ऑफर...? महायुती सरकारमधीलच माजी मंत्र्यांचा दावा

Mumbai News : एकनाथ शिंदेंनी 40 आमदारांना सोबत घेऊन शिवसेनेतला सर्वात मोठा उठाव घडवून आणला होता. या घटनेला जवळपास पावणेतीन वर्षांचा कालावधी लोटला असला तरी त्याबाबतचे दिवसेंदिवस धक्कादायक खुलासे शिवसेनेसह महायुतीच्या नेतेमंडळींकडून सातत्यानं समोर येत असतात. आता माजी मंत्री आणि एकनाथ शिंदे (Eknath Shinde) यांचे कट्टर समर्थक दीपक केसरकर यांनी आता एक नवा खळबळजनक दावा केला आहे.

माजी शालेय शिक्षणमंत्री व एकनाथ शिंदेंच्या शिवसेनेचे प्रवक्ते दीपक केसरकर यांनी गुरुवारी (ता.3 एप्रिल) माध्यमांशी संवाद साधला. यावेळी त्यांनी सर्वात मोठा खुलासा केला आहे. केसरकर म्हणाले, एकनाथ शिंदेंनी जून 2022 मध्ये मोठा निर्णय घेत शिवसेनेमधून बाहेर पडण्याचा निर्णय घेतला होता.

त्यांच्या याच निर्णयामुळे महाविकास आघाडी सरकार अल्पमतात आलं होतं. याचमुळे उद्धव ठाकरेंना मविआ सरकारच्या मुख्यमंत्री पदाचा राजीनामा द्यावा लागला होता. मात्र त्यानंतर उद्धव ठाकरे (Uddhav Thackeray) यांनी एकनाथ शिंदे यांना मुख्यमंत्री पदाची ऑफर दिल्याची गौप्यस्फोट केसरकरांनी यावेळी केला आहे.

ते म्हणाले, पक्षप्रमुखांनी एकनाथ शिंदेंना मुख्यमंत्री पदाची ऑफर दिली होती. पण त्यावेळी शिंदेंनी पुन्हा युतीची स्थापना करावी अशी अट घातली.ती मान्य न झाल्यानं शिंदे यांनी आपल्या सोबतच्या आमदारांसह पुढचं पाऊल उचललं आणि राज्यात भाजप शिवसेना युतीचं सरकार सत्तेत आलं, असंही केसरकरांनी यावेळी सांगितलं.

यावेळी माजी मंत्री दीपक केसरकर यांनी वक्फ विधेयकावरही शिवसेना पक्षाची भूमिका स्पष्ट केली. ते म्हणाले,उद्धव ठाकरे यांच्यासाठी फतवे निघाले आहेत.पण आम्ही कोणत्याही धर्मात भेदभाव करत नाही. मात्र,जेव्हा मोठ्या मालमत्ता असतात, तेव्हा त्यांचे परफेक्ट मॅनेजमेंट व्हायला हवं,असंही त्यांनी यावेळी सांगितले.

शिवसेना (उद्धव ठाकरे) पक्षाचे खासदार संजय राऊत यांनी राज्यसभेत वक्फ विधेयकावर चर्चा सुरू असताना सत्ताधारी भाजपवर जोरदार टीका केली. संजय राऊत म्हणाले, "तुम्ही (भाजप) खुश दिसत आहात, पण मुसलमानांची इतकी काळजी तर पाकिस्तानच्या मोहम्मद अली जिन्नांनाही नव्हती. जिन्नांचा आत्मा उठून तुमच्यात बसला आहे का?" त्यांच्या या टीकेमुळे सभागृहात गोंधळ उडाला.