Uddhav Thackeray backup plan : राज ठाकरेंसोबत नाहीच जुळलं तर? उद्धव ठाकरेंकडून बॅकअप प्लॅनिंगला सुरुवात; जिल्हाप्रमुखांच्या बैठकीत दिले 'हे' मोठे आदेश

Mumbai News : स्थानिक स्वराज्य संस्थेच्या निवडणुकीची सर्वच पक्षाने तयारी सुरु केली आहे. निवडणूकांची घोषणा लवकरच होंण्याची शक्यता असल्याने तयारीला वेग आला आहे. या निवडणुकीसाठी उद्धव ठाकरे यांच्या शिवसेनेने रणनीती आखण्यास सुरुवात केली आहे.

ठाकरेंच्या शिवसेनेचा 59 वर्धापनदिन सोहळा गुरुवारी मुंबईतील षण्मुखानंद हॉलमध्ये मोठ्या उत्साहात पार पडला. या सोहळ्यात उद्धव ठाकरे यांनी भाषणातून केंद्र व राज्य सरकारच्या कारभारावर चौफेर टीका केली. त्यातच ठाकरेंनी महापालिका निवडणुकीचे रणशिंग फुंकताना येत्या काळात मनसेसोबत युती करण्याचे संकेत दिले आहेत. त्यांनतर ठाकरेंनी जिल्हाप्रमुख आणि संपर्कप्रमुख नेत्यांच्या बैठकीत मनसे सोबतच्या युतीसाठी आणखी एक पाउल पुढे टाकला आहे.

येत्या काळात होत असलेल्या महापालिका निवडणुकांसाठी उद्धव ठाकरे (Uddhav Thackeray)यांच्या उपस्थित जिल्हाप्रमुख आणि संपर्कप्रमुख नेत्यांची बैठक घेतली. त्यावेळी त्यांनी आगामी काळात होत असलेल्या निवडणुकीसाठी कानमंत्र दिला आहे. राज्यभरात स्थानिक पातळीवर युती, आघाडी करण्यासंदर्भात आढावा घेण्याच्या सूचना दिल्या आहेत. येत्या काळात युती, आघाडी झाली नाही तर सर्व जागांवर पक्ष म्हणून लढण्यास तयार राहण्याच्या सूचना उद्धव ठाकरे यांनी दिल्या आहेत.

येत्या काळात मनसेसोबत (MNS) युतीसाठी आपण सकारात्मक आहोत. मात्र, स्थानिक पातळीवर युती, आघाडी संदर्भात आढावा घेऊन माहिती द्या, अशा सूचना उद्धव ठाकरे यांनी जिल्हाप्रमुखांना दिल्या. स्थानिक पातळीवर कुठे आघाडी, युती करायची याचा निर्णय पक्ष घेईल. त्यामुळे महिन्याभरात हा अहवाल जिल्हाप्रमुख संपर्कप्रमुख यांनी देण्याच्या सूचना केल्या आहेत.

त्यासोबतच येत्या काळात मतदार याद्यांचा अभ्यास करा, लोकसभेनंतर विधानसभा निवडणुकीत मतदार कसे वाढले? कुठे वाढले? बोगस मतदार शोधा? गटप्रमुखांनी 40 लाख मतदार कसे वाढले हे तपासा, मतदार याद्यांच्या घोळाबाबत माहिती समोर आणा, अशा सूचना उद्धव ठाकरे यांनी केल्या आहेत.