Shivsena UBT MNS Alliance : उद्धव ठाकरेंनी राज यांच्यासोबतच्या युती संदर्भात केलेल्या सूचक वक्तव्यावर मनसेची पहिली प्रतिक्रिया

Mumbai News, 20 Jun : ठाकरेंच्या शिवसेनेचे सर्वेसर्वा उद्धव ठाकरे आणि महाराष्ट्र नवनिर्माण सेनेचे अध्यक्ष राज ठाकरे हे दोन्ही ठाकरे बंधू एकत्र येणार असल्याच्या चर्चा मागील काही दिवसांपासून सुरू आहेत.

अशातच काही दिवसांपूर्वी राज्याचे मुख्यमंत्री देवेंद्र फडणवीस यांनी राज ठाकरेंची एका हॉटेलमध्ये भेट घेतल्याची बातमी समोर आली. त्यानंतर ठाकरेंच्या शिवसेनेकडून मराठी माणसांची युती होऊ नये यासाठी भाजप प्रयत्न करत असल्याचा आरोप करायला सुरूवात केली.

काल झालेल्या शिवसेनेच्या वर्धापन दिनाच्या सोहळ्यात बोलताना देखील उद्धव ठाकरेंनी मनसेसोबत युती करण्याबाबत सकारात्मक वक्तव्य केलं. शिवाय ती होऊ नये म्हणून भाजप आणि शिंदे गट प्रयत्न करत असल्याचा पुनरुच्चार केला. ते म्हणाले, "बातम्या सुरू आहेत. काय होणार? होणार की नाही होणार हे कळेल ना, जे राज्याच्या मनात आहे तेच मी करणार.

पण ते होऊ नये, मराठी माणसाची शक्ती एकत्र येऊ नये म्हणून यांच्या मालकाचे नोकर गाठीभेटी घेऊ लागले. हॉटेलात भेटतात. पण काहीही झालं तरी मुंबई परत शिवसेनेच्या ताब्यात घेणारच आहोत. मराठी माणसाच्या ताब्यात मुंबई गेली तर मालकाचं कसं होणार. मालकाच्या मित्राचं कसं होणार म्हणून मराठी माणसाची शक्ती एकवटता कामा नये. म्हणून शेठजीचे नोकर प्रयत्न करत आहेत."

उद्धव ठाकरेंच्या या वक्तव्यानंतर पुन्हा एकदा उद्धव ठाकरेंनी युतीसाठी हात पुढे केला असून मनसे याबाबत नेमकी काय भूमिका घेणार याकडे सर्वांचं लक्ष लागलं आहे. दरम्यान, मनसे आणि शिवसेना ठाकरे गटाच्या युतीबाबतच्या चर्चा सुरू असताना आणि काल उद्धव ठाकरेंनी केलेल्या वक्तव्यावर आता मनसेचे एक ज्येष्ठ नेते प्रकाश महाजन यांनी प्रतिक्रिया दिली आहे.

प्रकाश महाजन म्हणाले, "युतीबाबतची भूमिका पक्षप्रमुख राज ठाकरेच घेतील आणि स्पष्ट करतील. त्यामुळे मेळाव्यातून आणि पत्रकार परिषदेतून जो काही प्रतिसाद किंवा प्रस्ताव येतो तो प्रत्यक्षात जेव्हा त्यांच्याकडे जाईल, त्यावर ते निर्णय करतील. आता हे सांगणं खूपच घाईचं होईल असं मला वाटतं."