Honey Trap Case : 'तिकीट लावून त्यांनी 'सीडी' लावावीच'; मंत्री विखेंचं वडेट्टीवार अन् राऊतांना खुलं आव्हान

Honey trap case politics : राज्यात गाजत असलेल्या हनी ट्रॅप प्रकरणावरून राजकीय वातावरण तापलं आहे. विरोधकांनी तिकीट लावून सीडी दाखवण्याची भाषा वापरली आहे. महाविकास आघाडी सरकार याच हनी ट्रॅपमुळे गेल्याचा आरोप केला.

या राज्यातील चार मंत्री असून, त्यात दोन भाजपच्या मंत्र्यांचा समावेश आहे, असा दावा करत खळबळ उडवून दिली आहे. मुख्यमंत्री देवेंद्र फडणवीस यांनी हनी ट्रॅपचे सर्व मुद्दे फेटाळून लावले असतानाच, भाजप मंत्री राधाकृष्ण विखे पाटील यांनी देखील, 'तिकीट लावून सीडी लावावीच', असं आव्हान विरोधकांना दिलं आहे.

मंत्री राधाकृष्ण विखे पाटील (Radhakrishna Vikhe) म्हणाले, "नाशिक हॅनी ट्रपची सीडी तिकीट लावून दाखवू म्हणणाऱ्यांनी आपले पुरावे मुख्यमंत्री देवेंद्र फडणीसांकडे का दिले नाहीत? शिवसेना उद्धव बाळासाहेब ठाकरे सेना पक्षाचे खासदार संजय राऊत देखील याप्रकरणात रोज संशय निर्माण करत आहेत. त्यांच्याकडे काही असेल तर त्यांनी पोलिसांकडे द्यायला हवे. प्रफुल्ल लोढा नामक जो कोणी म्हणतो की मी बटन दाबताच देशात खळबळ माजेल. त्याने खुशाल बटन दाबायला हवे".

'मुख्यमंत्री देवेंद्र फडणवीस यांनी सभागृहात स्पष्टपणे सांगितले की, हे प्रकरण 'हनी ट्रप'चे नाही. कुणी माझ्याकडे तसे पुरावे दिलेले नाहीत. तरी गृहमंत्रालयाकडून या प्रकरणाची तपासणी सुरू आहे. कोण त्या हाॅटेलातील ट्रॅपमध्ये गेले, याचा तपास सुरू आहे. या प्रकरणात कुणाला ब्लॅकमेलिंग केले जात असेल, तर त्याचे समर्थन करण्याचे कारण नाही. दोषी असेल त्याच्यावर कारवाई होईल. टीका आणि आरोप करणे हे विरोधकांचे कामच आहे. मात्र विरोधकांनी पुरावे द्यायला हवेत. उगाच संशयाचा भोवरा कशाला? तिकीट लावून ज्यांना व्हिडिओ दाखवायचाय त्यांनी दाखवा खुशाल. आधी पुरावे तर द्या', असे मंत्री विखे पाटील यांनी म्हटले.

शिवसेनेचे (Shivsena) संजय राऊत यांनी या प्रकरणात भाजपचे दोन मंत्री आहेत. त्यात एक अहिल्यानगरचे भाजपचे मंत्री देखील आहेत, असा आरोप केला आहे. त्यावर बोलताना विखे पाटील म्हणाले की, 'विनाकारण संशयाचे वातावरण निर्माण करून लोकांना त्यात अडकावयाचे. त्यांनी गृहमंत्रालयाकडे पुरावे द्यावेत. लोढा यानेही बटन दाबावे'.

छावाचे पदाधिकाऱ्यावर झालेला हल्ला निषेधार्ह आहे. खासदार सुनील तटकरे यांनी या घटनेचा निषेध केला. हल्लेखोरावर कारवाई देखील झाली आहे, असेही मंत्री विखे पाटील यांनी म्हटले.

कृषिमंत्री माणिकराव कोकाटे यांनी मोबाईल सुरू करतात जंगली रमीची जाहिरात आली का, त्याचे व्हिडिओ शूटिंग कुणी केले, ते माध्यमांकडे कसे गेले, असे बरेच प्रश्न आहेत. मला वाटते त्यावर कुणीही एवढ्या घाईने व्यक्त होणे योग्य नाही, असे मंत्री विखे पाटील यांनी मंत्री कोकाटे यांच्या रमी खेळण्याच्या मुद्यावर प्रतिक्रिया दिली.