Ajit Pawar : अजितदादांनी दाखवला मराठी बाणा ; हिंदी पत्रकाराला ठणकावलं, म्हणाले 'इथं आधी मराठीच चालतं !

Ajit Pawar : राज्यातील शाळांमध्ये हिंदी शिकवण्याचा जीआर सरकारने रद्द केला असला तरी वारंवार मराठी भाषा बोलण्यावरुन वाद निर्माण होताना दिसत आहे. परप्रातीयांची मुजोरी दिवसेंदिवस वाढताना दिसत आहे. या सगळ्या घडामोडी घडत असताना राज्याचे उपमुख्यमंत्री अजित पवार यांनी यासंदर्भात प्रतिक्रिया दिली आहे. अजितदादांनी यावेळी आपला मराठी बाणा दाखवला व परप्रातियांना ठणकावलं आहे.

आज मंत्रालयात माध्यमांशी ते बोलत होते. त्यावेळी एका पत्रकाराने त्यांना हिंदीतून प्रश्न केला. यावेळी अजित पवार यांनी आधी मराठी प्रश्नांची उत्तरे देणार असल्याचं ठणकावून सांगितलं. अजित पवार म्हणाले ही काय पद्धत आहे तुमची, हा महाराष्ट्र आहे..इथं पहिलं मराठी चालतं. हा शाहू, फुले आंबेडकरांचा महाराष्ट्र आहे. मराठी झाल्यावर मग हिंदी" असं अजित पवारांनी ठणकावलं..

त्यानंतर पत्रकारांनी मराठी भाषेवरुन सुरु असलेल्या वादावर प्रश्न केले असता अजित पवार म्हणाले, सगळ्यांनी आपापलं भान ठेवून वागलं व बोललं पाहिजे. त्या- त्या राज्यात त्या- त्या राज्याची मातृभाषा महत्वाची असते. परंतु प्रत्येक राज्यात मातृभाषेबरोबरच दुसरी कुठली भाषा चालत असेल तर ती हिंदी भाषा चालते. तिसरी भाषा जर कुठली चालत असेल तर इंग्रजी चालते. अशाप्रकारे साधारण गणित आहे. जम्मू काश्मीरपासून कन्याकुमारीपर्यंत हीच परिस्थिती आहे.

प्रत्येकाला आपल्या मातृभाषेबद्दल अभिमान असला पाहीजे. आदर, प्रेम असलं पाहीजे. मातृभाषा टिकली पाहीजे. मराठी भाषेला अभिजात भाषेचा दर्जा दिला आहे. त्याबद्दल आपण पंतप्रधानांचे अभिनंदन केले आहे. पण आता जे घडतंय की महाराष्ट्रात राहणाऱ्यांना मराठी येत नसेल तर त्यांनी सांगावं की, आम्ही महाराष्ट्रात राहतो पण चांगली मराठी येत नाही पण मराठीचा आम्ही आदर करतो. आम्ही शिकण्याचा प्रयत्न करतो, असं बोलाना.. असं बोललं तर काही होणार नाही. पण काही मुजोरी दाखवतात.. असं चालत नाही.

अजित पवार पुढे म्हणाले, आपण जिथे काम करतो, तिथल्या लोकांचे म्हणणे काय आहे. त्यांचा विचार काय आहे, याचा विचार मराठी न येणाऱ्यांनी करायला हवा. सर्वांनी एकमेकांबरोबर आनंदाने राहिले पाहीजे.

दरम्यान राज्यपालांनी मराठी भाषेविषयी केलेल्या विधानावर विचारले असता त्यावर बोलण्यास त्यांनी नकार दिला. राष्ट्रपती, राज्यपाल यासारखी पदे खूप मोठी आहेत. त्यांनी केलेल्या विधानावर मी किंवा इतर कुणी प्रतिक्रिया देणे योग्य होणार नाही असं अजित पवार म्हणाले.