Ajit Pawar Politics: अजित पवारांच्या बैठकीत जिल्हा बँकेची पठानी वसुली थांबवण्याच्या सूचना!

Ajit Pawar News: नाशिक जिल्हा मध्यवर्ती सहकारी बँक वाचविण्यासाठी आज मंत्रालयात बैठक झाली. उपमुख्यमंत्री अजित पवार यांच्या दालनात झालेल्या या बैठकीत विविध सूचना करण्यात आल्या. शेतकऱ्यांना सवलती देऊन बँक कशी वाचवावी हा कानमंत्र यावेळी देण्यात आला.

उपमुख्यमंत्री अजित पवार यांच्या उपस्थितीत आज मंत्रालयात बैठक झाली. या बैठकीत राज्य सहकारी बँकेचे प्रशासक मकरंद अनासकर यांनी सादरीकरण केले. त्यात नफ्याचा विचार न करता थकबाकी वसुलीला प्राधान्य देण्याच्या सूचना करण्यात आल्या.

या बैठकीत नाशिक जिल्हा बँकेच्या अधिकाऱ्यांनीही विविध सूचना केल्या. मात्र एक लाखापर्यंत दोन टक्के, एक ते पाच लाख तीन टक्के, पाच ते दहा लाख चार टक्के आणि त्यापुढे पाच टक्के असे सरळ व्याज लावण्यात यावे. चक्रवाढ व्याज टाळून थकबाकी वसुलीला प्राधान्य देण्याच्या सूचना देण्यात आल्या.

या बैठकीला कृषिमंत्री माणिकराव कोकाटे, शालेय शिक्षण मंत्री दादा भुसे, अन्न व औषध प्रशासन मंत्री नरहरी झिरवाळ, सहकार मंत्री बाबासाहेब पाटील हे चार मंत्री उपस्थित होते. मुख्यमंत्री कोकाटे यांनी यापूर्वी राज्य सहकारी बँकेच्या प्रतिनिधींच्या उपस्थितीत जिल्हाधिकारी कार्यालयात बैठक घेतली होती. पुढील नियोजन त्या बैठकीत ठरले होते.

जिल्हा बँक वाचविण्यासंदर्भात झालेल्या आजच्या बैठकीत आमदार हिरामण खोसकर, आमदार सरोज अहिरे, आमदार नितीन पवार तसेच आमदार दिलीप बनकर ऑनलाइन सहभागी झाले होते. बँकेचे १२७ कर्जदार मयत झाले आहेत. या कर्जदारांच्या वारसा कडून केवळ मुद्दल वसूल करण्यात यावी, अशा सूचना करण्यात आल्या.

बँकेला तातडीची गरज म्हणून ९०० कोटी रुपयांची गरज आहे. संदर्भात राज्य सहकारी बँकेने ही मदत करावी, अशी बँकेच्या प्रशासकांची मागणी होती. लोकप्रतिनिधींनी यापूर्वीच बँक वाचविण्यासाठी पुढाकार घेतला आहे. त्यासाठी विविध आमदार आणि खासदारांनी बँकेत ठेवी ठेवल्या.

आगामी काळात राज्य सहकारी बँकेच्या मार्गदर्शनाखाली जिल्हा बँकेच्या वसुलीला गती देण्यात येईल. मध्ये व्याजात सवलत आणि सरळ व्याज पद्धतीने आकारणीचा निर्णय झाला. प्रशासन या संदर्भात शेतकऱ्यांकडे जाऊन वसुली करणार आहे.

शेतकऱ्यांच्या कर्ज वसुलीवर भर देताना एक रकमी परतफेड योजनेतून त्यांना सवलत देण्याचा निर्णय झाला आहे. थकबाकीदारांनाही वसुलीसाठी सवलती दिल्या जातील त्यामुळे शेतकऱ्यांचे बँकेतील व्यवहार वाढवून रोखता वाढण्यास मदत होईल. त्यामुळे बँकेच्या आर्थिक अडचणीतून मार्ग निघेल असा विश्वास यावेळी व्यक्त करण्यात आला.

-------