Anna Hazare on Pune controversy : अण्णा हजारेंना 'पुणेरी टोमणे' झोंबले; म्हणाले, '10 कायदे आणले, नव्वदीत देखील करत राहायचं का?'

Ahilyanagar Parner Anna Hazare : काँग्रेस नेते राहुल गांधी यांच्या मत चोरीच्या मुद्यावर देशातील राजकारण तापले असताना, ज्येष्ठ समाजसेवक अण्णा हजारे यांची प्रतिक्रिया समोर आली नाही.

यावरून त्यांना झोंबणारे 'पुणेरी टोमणे' मारणारा बॅनर पुण्यातील पाषाण रोडवर परिसरात झळकवण्यात आला. त्या बॅनरवरील पुणेरी टोमणे अण्णा हजारे यांना चांगलेच झोंबले असून, त्यावर त्यांनी प्रतिक्रिया देत नाराजी व्यक्त केली आहे.

अण्णा हजारे (Anna Hazare) म्हणाले, "मी 10 कायदे आणले. मात्र 90 वर्षानंतर देखील मी करत राहावं आणि तुम्ही झोपून राहावं, ही अपेक्षा चुकीची आहे. अण्णांनी जे केलं ते आपण करावं, असं तरुण युवकांना वाटलं पाहिजे, देशाचे नागरिक आहेत तर, आपलं काही कर्तव्य आहे की नाही?"

'काल स्वतंत्र दिवस साजरा केला. नुसता तिरंगा हातात घेऊन होणार नाही, बोट दाखवून काहीही होणार नाही. मी मोठ्या आशेने तरुणाकडे पाहतोय, युवा शक्ती ही राष्ट्र शक्ती आहे, ही जागी झाली तर उद्याच भविष्य दूर नाही', असे अण्णा हजारे यांनी म्हटलं आहे.

'मात्र एवढे वर्ष लढून कायदे करून जेव्हा कानावर येतं अण्णांनी जाग झालं पाहिजे, तेव्हा वाईट वाटत', असे म्हणत अण्णा हजारेंनी नाराजी व्यक्त केली. अण्णा हजारेंनी 2012 मध्ये दिल्लीत (Delhi) मोठं आंदोलन उभारलं होतं. दिल्लीच्या जंतर-मंतर मैदानावर झालेल्या या आंदोलनात देशभरातून लोक सहभागी झाले. आणि याच आंदोलनाचा फटका 2014 मध्ये काँग्रेसला बसला. काँग्रेसची सत्ता जाण्यामध्ये कुठेतरी या आंदोलनाचा देखील वाटा होता.

भाजप सरकारच्या काळामध्ये अण्णा हजारेंनी एकही मोठं आंदोलन केलेलं नाही, तस पाहायला मिळत देखील नाही. त्यामुळे सध्या काँग्रेसकडून देशभरामध्ये मत चोरी बाबत आंदोलन उभारण्यात आलं आहे. या पार्श्वभूमीवर हे बॅनर सध्या पुण्यात झळकत असल्याचे पाहायला मिळत आहे.