Ashok Kharat : तू खूप सुंदर आहेस… पण तुझा पती तुला.. अशोक खरात महिलांना कसं ओढायचा जाळ्यात? चौकशीत धक्कादायक माहिती उघड

Nashik News : नाशिकमधील भोंदूबाबा अशोक खरात हा महिलांवरील अत्याचार प्रकरणात पोलिस कोठडीत असून खरातला आज न्यायालयात हजर केले जाणार आहे. त्याच्यावर दाखल गुन्ह्यांमध्ये आता वाढ झाली आहे. शेकडो महिलांचे लैगिंक शोषण व आर्थिक फसवणूक प्रकरणात त्याच्यावर आतापर्यंत दहा गुन्हे दाखल झाले आहेत. त्यामुळे त्याच्या कोठडीत वाढ होण्याची शक्यता आहे.

दरम्यान, खऱातची एसआयटीने कसून चौकशी केली आहे. खरातच्या काळ्या कारनाम्यांबाबत दिवसेंदिवस नवे धक्कादायक खुलासे समोर येत असून तो महिलांना कशाप्रकारे आपल्या जाळ्यात ओढायचा तेही चौकशीत उघड झाले आहे. तो महिलांना आपल्या जाळ्यात ओढण्यासाठी अनेक फंडे वापरत. त्यात पोलिसांनी केलेल्या चौकशीत असे उघड झाले आहे की, खरात महिलांशी गोड बोलून, त्यांची स्तुती करून आणि भावनिक पातळीवर जवळीक साधून त्यांना आपल्या जाळ्यात ओढत होता. त्यासाठी तो कथित माइंड रिडींग स्ट्रॅटेजी वापरत असे.

महिला कौटुंबिक समस्या घेऊन खरातकडे जात. तो अगदी बरोबर त्यांची दुखती नस ओळखून फायदा घेत असल्याचे समोर आले आहे. 'तू खूप सुंदर आहेस, 'तुझा पती तुला समजून घेत नाही', त्याला तुझी कदर नाही, 'तुझी खरी क्षमता कोणालाच कळत नाही' अशा प्रकारे शब्दांचे जाळे टाकत तो महिलांना प्रभावित करत असल्याचे समोर आले आहे. त्यानंतर तो महिलांना विविध गोष्टी आणि उपाय सांगून आपल्या जाळ्यात ओढत. भोंदू खरातच्या या गोड बोलण्यात महिला फसत अशी माहिती सूत्रांनी दिली. चौकशीत त्याने भावनिक जाळं विणून महिलांचा विश्वास संपादन केल्याची कबुली दिल्याचीही माहिती समोर येत आहे.

दरम्यान, आतापर्यंत खरातविरोधात दाखल झालेल्या 10 गुन्ह्यांमध्ये 8 गुन्हे हे महिलांवरील अत्याचारासंदर्भात तर 2 गुन्हे आर्थिक फसवणुकीशी संबंधित आहेत. त्याने आतापर्यंत किती महिलांचे शोषण केले आहे याचा आकडा अद्याप कळू शकलेला नाही. कारण त्यासंदर्भात विचारले असता खरातने उत्तर देणे टाळल्याचे समजते. नेमका आकडा सांगता येणार नाही असा दावा खरातने केल्याचे सूत्रांकडून कळते.

दरम्यान आज खरातची कोठडी संपणार असल्याने त्याला न्यायालयात हजर केले जाणार आहे. परंतु खरातवर आणखी नवे दोन गुन्हे दाखल झाल्याने या गुन्ह्यांचा तपास करण्यासाठी एसआयटीकडून त्याची कोठडीची मुदत वाढवून मागितली जावू शकते. न्यायालयाने त्याला मंगळवारी दि. २४ पाच दिवसांची कोठडी सुनावली होती.