Bank Accounts Frozen : शिर्डीतील ‘समताने’ गोठवलेल्या खरातच्या खात्यातील रक्कम समोर; नाशिकच्या जगदंब पतसंस्थेत 32 खाते!

Ashok Kharat bank accounts frozen: नाशिकमधील विकृत भोंदूबाबा अशोक खरात याने महिलांच्या लैगिंक शोषण करण्याबरोबरच स्वतःच्या फायद्यासाठी निर्माण झालेल्या राजकीय संबंधातून कोट्यवधी रूपयांची माया जमवली. दररोज कॅशचे बंडलं त्याच्या घरी जात होते. या पैशाचं पुढं काय झालं, याचा शोध आता पोलिस घेत आहेत.

अहिल्यानगरमधील समता नागरी पतसंस्था आणि नाशिकमधील जगदंबा नागरी पतसंस्थेत अशोक खरात याच्या खात्यांची माहिती समोर आली आहे. शिर्डीतील 'समता'मधील बँक खाती गोठवण्यात आली आहे. नामकर्ण आवारे यांच्या सिन्नरमधील जगदंब पतसंस्थेत अशोक खरातची तब्बल 32 खाती असल्याचे तपासात समोर आले आहे.

शिर्डी पोलिस ठाण्यात अशोक खरात आणि त्याची पत्नी कल्पनाविरोधात बेकायदेशीर सावकारकीचा गुन्हा दाखल झाला आहे. पोलिसांनी खरातच्या व्यवहारांची तपासणी सुरू केली आहे.

यातच समता नागरी पतसंस्थेत त्याची खाती आढळली आहेत. तसंच वारसदार असलेली शेकडो बँक खात्यांची माहिती समोर आली. याशिवाय नाशिकमधील (Nashik) जगदंबा पतसंस्थेत देखील त्याची 32 बँक खाती असल्याचं समोर आलं आहे.

समता नागरी पतसंस्थेनी शिर्डी (Shirdi) पोलिसांच्या पत्रावरून लगेचच, त्याच्या बँक खात्याची माहिती दिली आहे. ही माहिती अवघ्या दोन तासांत पतसंस्थेकडून देण्यात आल्याचा दावा संचालक संदीप कोयटे यांनी केला आहे. अशोक खरात याची सर्व खाती गोठवण्यात आली असून, त्याच्या चार खात्यात 30 लाखांची रक्कम आहे.

अशोक खरातला संबंधित पैसे आले कोठून आणि दिले कुणाला, याचा शिर्डी पोलिस तपास करत आहेत. मोठ्या रकमा आॅनलाईन ट्रान्सफर झाल्या आहेत. खरात याच्या आर्थिक व्यवहाराबाबत गोपनीयता ठेवण्याच्या पोलिसांच्या सूचनाही पतसंस्थेला देण्यात आल्या आहेत.

नाशिकच्या सिन्नरमधील नामकर्ण आवारे यांच्या जगदंब पतसंस्थेचे संस्थापक असून, त्यांच्या पतसंस्थेत अशोक खरातची तब्बल 32 खाती असल्याचं तपासात समोर आलं आहे. एकाच व्यक्तीची एवढी खाती कशासाठी? आणि त्यातून नेमके कोणते आर्थिक व्यवहार पार पडले? याचा तपास शिर्डी पोलिसांनी सुरू केला आहे. आवारे आणि खरात यांच्या संबंधांवरून शिवसेना उद्धव ठाकरे सेनेच्या उपनेत्या सुषमा अंधारे यांनी भाष्य केलं होतं.