Rahul Dhikale : भाजपच्या पहिलवान आमदाराने दंड थोपाटले, म्हणे त्यांना आस्मान दाखवेन..

Nashik Politics : भाजपचे नाशिक पूर्व विधानसभा मतदारसंघाचे आमदार राहुल ढिकले हे मुळचे पहिलवान आहेत. त्यांच्यावर भाजप पक्षश्रेष्ठींनी नाशिक महापालिका निवडणुकीची जबाबदारी सोपवली आहे. राहुल ढिकले हे भाजपचे शहर निवडणूक प्रमुख आहेत. आता तर महापालिका निवडणुकीचा बिगुलही वाजला आहे. अशातच पालिका निवडणूक लक्षात घेऊन ढिकले यांनी त्यांच्या एका विरोधकाला नाव न घेता इशारा दिला आहे.

एका कार्यक्रमातील राहुल ढिकले यांचे भाषण सध्या व्हायरल झाले आहे. त्यात ढिकले म्हणाले आहेत की, विधानसभा निवडणुकीच्या वेळेला एकाने माझी रॅली आडवली. त्याला माहित नव्हतं की देव कुठे तरी असतो. मला निवडणुकीत त्रास दिला. माझ्यावर टीका केली. मी शत्रूला देखील माफ करणारा माणूस आहे. राजकारण राजकारण्याच्या ठिकाणी, पण व्यक्तिगत त्रास दिलेला सहन करणार नाही असं त्यांनी ठणकावून सांगितलं.

ढिकले पुढे म्हणाले, आता मी निवडणूक प्रमुख आहे. नाशिक महापालिकेत सगळे १२२ उमेदवार आहेत. सर्व प्रभागात मी हस्तक्षेप करणार नाही, मात्र मी पहिलवान आहे. ज्यांनी विरोध केला, ज्यांनी मला त्रास दिला त्यांना सोडणार नाही. त्यांना आस्मान दाखवल्याशिवाय राहणार नाही, असा इशारा ढिकले यांनी दिला. 'टप्प्यात येऊ द्या, नाही खाट मारली तर तालमीतला राहुल ढिकले नाही.

अर्थात ढिकले यांनी स्पष्टपणे कुणाचे नाव घेतले नसले तरी त्यांचा सगळा रोख त्याच्याच पक्षातील म्हणजे भाजपमधील गणेश गिते यांच्याकडे असल्याचे बोलले जात आहे. कारण विधानसभेला गणेश गिते यांनी बंडखोरी केली होती. भाजपला सोडून त्यांनी राष्ट्रवादीच्या तिकीटावर ढिकले यांच्याविरोधात निवडणूक लढवली होती.

निवडणुकीत गणेश गिते यांचा पराभव झाला. त्यानंतर त्यांनी पुन्हा मंत्री गिरीश महाजन यांच्या आशिर्वादाने भाजपमध्ये घरवापसी केली. परंतु निवडणुकीच्या वेळीला ढिकले व गिते यांच्यात मोठा संघर्ष उफाळला होता. काहींनी ढिकले यांची रॅली देखील अडवली होती. तोच संदर्भ राहुल ढिकले यांनी आपल्या भाषणात दिला आहे. त्यामुळे ढिकले यांचा पूर्ण रोख हा गणेश गिते यांच्याकडे होता असे दिसते.