Jamner Crime Politics: जामनेरला भाजप नेत्याच्या अटकेसाठी पोलीस ठाण्यात आंदोलन, रास्ता रोको

Jamner crime News: राजनी (जामनेर) येथील आकाश संजय पाटील या युवकाने गळफास घेऊन आत्महत्या केली. भाजप नेत्याच्या धमक्या आणि पोलिसांचा दबाव यामुळे ही घटना घडल्याचा आरोप होत आहे. त्यामुळे राजनी गावातील नागरिक संतप्त आहेत.

राजनी (जामनेर) येथील आकाश संजय पाटील या युवकाला काही लोकांकडून सातत्याने धमक्या दिल्या जात होत्या. यासंदर्भात त्याने पोलिसांशी संपर्क देखील केला होता. मात्र पोलिसांकडून कोणताही प्रतिसाद मिळाला नाही. त्यामुळे धास्तावलेल्या या युवकाने घरात गळफास घेऊन आत्महत्या केली.

आत्महत्या करण्यापूर्वी आकाश पाटील याने चिठ्ठी लिहून ठेवली आहे. मध्ये पाच जणांना आपल्या आत्महत्येसाठी जबाबदार धरण्यात यावे. भाजप नेता राजू अजमेरा याचा समावेश आहे. पोलिसांनी चार आरोपींना अटक केली मात्र अजमेरा अद्याप अटकेत नाही.

या प्रकाराने गावातील सर्व नागरिक संतप्त झाले आहेत. नागरिकांनी उपजिल्हा रुग्णालयातून आकाश पाटील यांचा मृतदेह ताब्यात घेण्यास नकार दिला. पोलीस सत्ताधाऱ्यांच्या दबावात आहेत असा आरोप केला. भाजप नेता अजमेरा याला अटक होईपर्यंत मृतदेह ताब्यात घेणार नाही, अशी भूमिका नातेवाईकांनी घेतली.

या घटनेनंतर राजनी गावात नागरिक संतप्त झाले. उपजिल्हा रुग्णालयापुढेच रास्ता रोको करण्याचा प्रयत्न केला. मात्र यावेळी तेथे आठवडा बाजार असल्याने पोलिसांनी दक्षता घेत हा रास्ता रोकोचा प्रयत्न हाणून पाडला. त्यानंतर नागरिकांनी पोलीस ठाण्यात जाऊन आरोपीवर कठोर कारवाईसाठी आंदोलन केले.

या घटनेनंतर उपजिल्हा रुग्णालयात मोठ्या प्रमाणावर पोलीस बंदोबस्त तैनात करण्यात आला. वेळी मृत आकाश पाटील यांच्या नातेवाईकांनी राजू अजमेरा हा भाजपचा पदाधिकारी असल्याने त्याला पोलीस संरक्षण देत असल्याचा आरोप केला. राष्ट्रवादी काँग्रेस शरदचंद्र पवार पक्षाचे नेते दिलीप खोडपे यांनी राजू अजमेरा याला सत्तेची मस्ती आली आहे, असा आरोप केला.

दरम्यान भाजप पदाधिकारी राजू अजमेरा याने यापूर्वीही राजकीय आशीर्वाद असल्याने परिसरात अनेक गुन्हे केले आहेत. अनेक युवकांना धमक्या देऊन त्रस्त केले आहेत. पोलिसांनी त्या विरोधात कठोर कारवाई केल्याशिवाय राजनी गावातील ग्रामस्थांचे समाधान होणार नाही असे सांगितले.

-----